Imajen/espesial.

DILI, 18 novembru 2021 (TATOLI)– Estrutura iha klube Primeira Divizaun Liga Feto Timor, Buibere FC deside ho votu unaminidade ba Farão Belo sai Prezidente foun hodi troka Lelia Martins. .

Leila Martins deside rezigna an tanba okupadu ho serbisu importante balun. Ho razaun ne’e  mak estrutura konvoka reuniaun hodi deside hili Farão Belo atu sai Prezidente foun ba Buibere FC.

“Ha’u koñese malu di’ak ho jogadora-sira no estrutura hotu tanba ami la’o hamutuk kleur, ha’u nia objetivu mak kontinua nafatin obra ne’ebé mak estrutura anteriór halo bele halo di’ak liután atu promove ita nia jogadora feto-sira iha Timor-Leste no mundu internasionál,” Prezidente Buibere Fc ne’e hateten ba Agência TATOLI iha Pateo-Dili, kinta ne’e.

Nia dehan, hanesan lideransa foun iha Buibere tenke buka meiu oinsá atu klube Primeira Divizaun Liga Feto Timor ne’e bele sai kampiaun dala ida tan iha époka 2021 no mós kampiaun ba taxa Rosa ‘Muki’ Bonaparte ne’ebé dadauk ne’e la’o hela.

Buibere hanesan ekipa ne’ebé forsa tebes iha Liga Feto Timor tanba iha époka 2020 sai kampiaun ba Liga feto hodi marka istória primeiru iha Timor-Leste,  bainhira liga ne’e hahú iha 2020 ne’ebé organiza hosi Federasaun Futeból Timor-Leste (FFTL).

Daudaun, Buibere nafatin hatudu nia performe ne’ebé di’ak hodi okupa segundu lugar iha tabela klasifikasaun Liga Feto Timor ho pontu ualu, enkuantu okupa iha pozisaun primeiru mak S’Amuser ho pontu 11, AD SLB pontu hitu, Maranatha FC pontu lima no akademica FC ho pontu zero.

Haree ba pontu ne’ebé la dook hosi Amuser fó esperansa ba Prezidente foun ne’e hamutuk ho estrutura hotu atu investe makas ba jogadór no treinadór sira atubele mantein nafatin titulu kampiaun dala ida tan.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here