Ministru Administrasaun Estatál, Miguel Pereira no Sekretáriu Estadu Juventude no Desportu, Abrão Saldanha, troka nota akordu inter-orgániku domíniu iha área juventude no desportu, iha salaun MAE, Caicoli, kinta (18/11). Imajen TATOLI/Egas Cristóvão

DILI, 18 novembru 2021 (TATOLI)–Sekretaria Estadu Juventude no Desportu (SEJD) no Ministériu Administrasaun Estatál (MAE), iha kinta ne’e, asina akordu inter-orgániku domíniu iha área juventude no desportu.

Ministru Administrasaun Estatál, Miguel Pereira, apresia kolaborasaun ne’e tanba liuhosi akordu ne’e bele delega kompeténsia domíniu juventude no desportu ba administrasaun munisipál.

“Ha’u kontente tanba hafoin tinan-lima nia-laran iha VIII Governu Konstituisionál, governamente na’in-rua konsege asina akordu inter-orgániku. Tanba ne’e, deskonsentra kompeténsia Governu sentrál hosi SEJD iha domíniu juventude no desportu ba administrasaun munisipál, nune’e autoridade munispál sira bele realiza atividade desportu eskolár no komunitáriu, tantu iha aldeia, suku, postu no munisípiu sira,” Ministru hateten iha ámbitu asina akordu, iha salaun MAE, Caicoli.

Notísia relevante: PN aprova projetu Lei Eleitorál Munisipál-Podér Lokál iha finál globál

Atividade ne’e hahú hosi nível komunitáriu, tanba tuir dekretu-lei númeru 03/2016 kona-ba estatutu Administradór munisipál, autoridade munisipál no grupu tékniku interministeriál ba sentralizasaun administrativa, deskonsentra ona kompeténsia lubuk ida ba munisípiu sira.

“Ha’u fiar ho akordu ne’e sei iha atividade juventude no desportu barak liu, ne’ebé envolve autoridade komunitáriu no lokál sira, hanesan mós envolve ita-nia juventude no populasaun barak iha nível aldeia no suku,” nia akresenta.

Papél Governu sentrál mak atu garante hadi’a prestasaun servisu públiku ba populasaun sira iha munisípiu no área rurál, ne’ebé bele realiza bainhira respeita no kumpri obrigasaun Konstituisionál.

“Administrasaun públika nia servisu sira mak tenke deskonsentradu posível no futuru dezentralizadu ba poder lokál sira, ne’ebé previstu ona iha artigu 72 Konstituisaun,” nia dehan.

Akordu inter-orgániku ne’ebé asina ona hein públika iha jornál repúblika no ba oin sei implementa programa sira.

Orsamentu kustu ba jestaun organizasaun programa desportu eskolár ba ensinu báziku no sekundária hamutuk milliaun $231.750.

Iha biban hanesan, Sekretáriu Estadu Juventude no Desportu, Abrão Saldanha, hateten, inisiativa ne’e atu parte rua realiza hodi habesik servisu ho forma sistemátiku no organizadu iha nível administrasaun lokál.

“Nune’e autoridade munisipál sira iha kompeténsia sufisiente hodi halo servisu domíniu juventude no desportu, tanba joven barak mak husu atu kria kampu iha aldeia sira no organiza eventu iha suku,” governante ne’e dehan.

Daudaun hahú dudu área rua ne’e tanba intensaun VIII Governu mak desentralizasaun, nune’e MAE delega kompeténsia ba administrasaun munisipál.

“Atividade ne’ebé ita sei halo iha domíniu juventude, hanesan formasaun iha suku hodi estimula eprendedorizmu joven sira, realiza atividade desportiva iha eskola nível ensinu báziku, sekundáriu no desportu komunitáriu, festivál, munisipál, no desportu tradisionál, ne’ebé atu promove ida-ne’e sai hanesan kompeténsia serbisu munisipál atubele tau matan,” Sekretáriu Estadu dehan

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here