Diretór Nasionál Empregu Exteriór SEFOPE, Filomeno Soares. Imajen TATOLI/Egas Cristóvão

DILI, 17 novembru 2021 (TATOLI)–Sekretaria Estadu Formasaun no Empregu (SEFOPE) liuhosi Diresaun Nasionál Empregu Exteriór (DNEE), iha kuarta ne’e, hamutuk reprezentante Human Resources Development Service of Korea (HRD Korea) EPS Center, prepara traballadór timor-oan hamutuk 70 ne’ebé sei arranka ba Koreia Súl iha loron 06 dezembru.

Diretór Nasionál Empregu Exteriór, Filomeno Soares, hateten, daudaun ne’e Governu Koreia súl fó filafali oportunidade ba Timor-Leste atu haruka tan traballadór, maski iha hela situasaun COVID-19, tanba ne’e SEFOPE sai hanesan mediadór ba traballadór sira no Koreia Súl hodi prepara kondisaun.

“Tanba problema ho aviaun, daudaun ita prepara rekezitu, nune’e  traballadór sira prepara-an di’ak molok arranka,” Diretór Nasionál ne’e hateten ba Agência TATOLI hafoin hasoru malu ho traballadór sira, iha HRD Korea, Becora.

Notísia relevante: Traballadór timor-oan na’in-60 aranka ohin bá Koreia Súl

Kona-ba problema aviasaun iha Timor-Leste, SEFOPE  hato’o ona ba HRD Korea, tanba ne’e resposta hosi Koreia Súl rasik pozitivu tebes hodi haruka uluk traballadór 70, enkuantu kandidatu seluk hein oportunidade seluk no prepara nafatin nune’e bainhira presiza hein buka dalan hodi haruka.

Prosesu preparasaun ba traballadór sira molok atu aranka, traballadór ida-idak tenke prepara rasik osan atu tama kaurentena kalan ida, molok ba, billete aviaun no to’o Koreia Súl tama kuarentena loron-14.

“Osan ne’ebé sira presiza $4.000, tanba to’o Koreia Súl tama kuarentena, sira rasik mak selu,” Filomeno dehan.

Nune’e mós, Reprezentante HRD Korea EPS Center, Jooyun, husu ba kandidatu traballadór sira tenke prepara-an didi’ak molok atu arranka tanba daudaun iha situasaun COVID-19 no husu ba traballadór sira atu aproveita didi’ak.

“Ita boot sira to’o Koreia la’ós de’it serbisu, maibé sei hetan mós esperiénsia ne’ebé aban bainrua bele aplika fali iha Timor-Leste,” nia enkoraja. 

Traballadór 70 ne’ebé sei arranka ba Koreia Súl sei serbisu iha área fábrika no peska.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here