Sintina públiku iha snal Dili hahú loke ba públiku. Imajen Tatoli/Nelia Fernandes.

DILI, 17 novembru 2021 (TATOLI)—Diretora Kompañia Salima, Auxilia Sarmento, hateten sintina públiku iha Díli hahú loke ba públiku, tanba kompañia Salima mak manan ona konkursu hosi Instituisaun Bee Timor-Leste Empreza Públika (BTL,E.P) hodi halo operasaun ba sintina públiku iha jardin sira iha Dili.

“Sintina públiku iha Dili hahú loke ba públiku, tanba aminia kompañia Salima tuir konkursu hosi Governu, liuhosi Instituisaun Bee Timor-Leste Empreza Públika no ami manan. Nune’e, iha loron 19 fulan outubru ne’e ami komesa halo servisu,” Auxilia Sarmento hateten ba Agência Tatoli, via telefónika, kuarta ne’e.

Nia hatutan, iha konkursu ne’e kompañia lima mak kompete atu jere sintina públiku no ikus kompañia Salima mak manan, tanba prenxe kritériu hosi BTL,E.P, no asina ona kontratu iha loron 18 fulan-outubru ne’e ho montante rihun $69.000 ba durasaun tinan ida.

Diretora ne’e hateten, maske kompañia Salima manan ona konkursu hosi Governu hodi halo operasaun ba sintina públiku hanesan iha Cristo Rei, Jardin Ponte B.J Habibie, Largo Lecidere, Jardin 05 de Maiu, Jardin 12 Novembru no Sionál, maibé daudaun ne’e sintina públiku balun labele utiliza tanba kondisaun odamatan aat.

“Tanba, iha uluk ne’e kompañia seluk mak kaer, entaun bainhira ami manan konkursu, sira entrega xave maibé xave ba haris fatin públiku iha Jardin Ponte B.J Habibie mak la funsiona hotu kedas no bee-moos laiha. Tanba ne’e, ami ko’alia ona ho Bee Timor-Leste hodi mai haree, tanba ami mai servisu hodi hamoos no fase sintina hodi moos, maibé se odamatan sira aat ami labele hatene. Tanba ne’e, sira haruka ami hein atu sira muda sistema foun, hanesan atu hadi’a fali odamatan, inklui ho torneira bee ne’ebé aat,” nia informa.

Daudaun ne’e, totál funsionáriu hodi tau matan ba sintina públiku hamutuk 16, kompostu hosi 14 hein sintina públiku no na’in-rua supervisor, ho salariu ba sira-ne’ebé fase sintina kada fulan $140 no ba supervizor kada fulan ho $160.

Vise-Prezidente Instituisaun Bee Timor-Leste Empreza Públika (BTL,E.P), Gustavo da Cruz, hateten daudaun ne’e kompañia Salima mak toma konta hodi halo operasaun ba sintina públiku iha Dili laran, tanba sira mak manan ona konkursu ba tinan ne’e.

Durante fulan ida ho balun sintina públiku taka ba públiku tanba kontratu antes hosi kompañia Nelses ho Ministériu Obras Públiku (MOP) nia kontratu termina ona, depois BTL hamriik hodi anúnsia fila-fali prosesu konkursu foun, entaun kompañia Salima mak manan no daudaun ne’e sira hahú halo servisu.

“Tuir loloos ami la taka iha fulan ida ho balun, maibé tanba ita-nia komunidade nia koñesimentu ba utilizasaun sintina públiku seida’uk di’ak, tanba ne’e ami taka provzizóriu hodi hein prosesu aprovizionamentu no grasa a deus prosesu la’o lalais no agora kompañia Salima mak halo operasaun ba sintina públiku,” nia informa.

Hatán ba preokupasaun hosi kompañia Salima katak odamatan aat no bee-moos laiha, Gustavo da Cruz hateten preokupasaun ne’ebé kompañia Salima hato’o ona ba BTL no BTL nia parte sei konklui iha kontratu kompañia Salima nian.

“Ha’u hanoin ami haree hela atu konklui iha sira-nia kontratu, depois ami sei haree hela. Tanba, kompañia aleinde halo manutensaun no operasaun ba sintina públiku la’ós nia ba hamoos no fase de’it, maibé ba odamatan no xave aat, nia tenke hadi’a. Tanba ne’e, ami haree tiha lai iha nia BoQ ne’ebé iha, nune’e bele fasilita. Labele tanba odamatan aat kompañia ida servisu iha ne’ebá hein fali konkursu foun, hodi kompañia foun ba hadi’a fali odamatan,” nia dehan.

Entretantu, tuir observasaun Agência Tatoli, katak daudaun ne’e sintina públiku hahú loke ba públiku hanesan iha Cristo Rei, Jardin Ponte B.J Habibie, Largo Lecidere, Jardin 05 de Maio, Jardin 12 Novembru no Sionál, maibé iha Sionál mak bee-moos laiha no funsionáriu hosi kompañia Salima kuru bee iha Unidade Polísia Marítima (UPM).

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here