Koordenadór SERVE, I.P, sukursál Baucau, Raul Sanches Lajes. Imajen Tatoli /Natalino Belo.

BAUCAU, 17 novembru 2021 (TATOLI) – Servisu Rejistrasaun no Verifikasaun Emprezariál (SERVE) sukursál Baucau konsege rekolla reseita hamutuk $3.334.50 iha fulan-outubru.Koordenadór Servisu Rejistrasaun no Verifikasaun Emprezariál (SERVE.ip) sukursál Baucau, Raul Sanches Lajes, hateten, kada fulan ne’e mantein reseita $3.000 ba leten tanba maioria komunidade Baucau-oan halao vida negósiu.

“Hosi númeru rejistu nian iha fulan-outubru ita rekolla reseita hamutuk $3.334.50 ne’e mai hosi rejistu. Reseita hirak-ne’e ita kobre hosi renovasaun no alterasaun,” Koordenadór SERVE Baucau ko’alia iha vila nova, kuarta ne’e.

Durante fulan-outubru, númeru rejistrasaun foun hamutuk 53 kompostu hosi empreza EN hamutuk 36, unipessoal hamutuk 16 no Ltd ida.

Jeralmente tuir státistika Baucau-oan maiória hamutuk 60% hala’o vida negósiu nune’e sempre iha inisiativa loke negósiu no parte mós hosi kritériu banku nian atu asesu kréditu.

Dokumentu importante ba asesu kréditu hamutuk tolu hanesan sertidaun rejistu komersiál, sertifikadu rejistu komersiál no autorizasaun ezersísiu komersiál.

“Hosi tolu ne’e mak bele aplika iha Banku tanba presiza rekizitu hosi SERVE atu asesu ba kréditu, negosiante sira mós bainhira hetan sertifikadu sira-ne’e atu asegura negósiu,” Raul akresenta.

Nune’e mós bele iha baze legaá hodi hatán bainhira AIFAESA halo inspesaun ba atividade negósiu.

Razaun seluk mak aumenta atividade negósiu no renovasaun tanba empreza balun halo atividade negósiu mínimu lima.

“Ho razaun ne’e mak kada fulan Baucau-oan sempre mai loke negósiu no halo alterasaun ba dokumentu hanesan diresaun ka fatin no aumentu atividade negósiu inklui renovasaun,” Raul hateten.

Entretantu, SERVE mós iha mekanismu rua atu halo atendimentu ba kliente iha Baucau hanesan direitamente iha edifísiu no liuhosi online.

SERVE Baucau hahú halo atendimentu iha munisípiu Baucau iha tinan 2018 no daudaun ne’e rejista ona kompaña foun hamutuk 656, renovasaun hamutuk 769 inklui alterasaun ka aumenta atividade hamutuk 754.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here