Embaxadór Portugal iha Timor Leste, Pedro Machado Vieira no Koordenadora Konsultóriu Lingua Portuges ba Jornalista (CLJ-Sigla Portuges) hala'o enkontru kortezia ho Sekertáriu Estadu Komunikasaun Sosiál, Merício Juvinal dos Reis ‘Akara’. Iha salaun enkontru SEKOMS, kuarta (17/11). Imajen Tatoli/Francisco Sony.

DILI, 17 novembru 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hateten tinan ne’e SEKOMS kontinua fasilita formasaun lian portugés ba jornalista sira hosi mídia nasionál hodi apoia no dezenvolve lian portugés iha informasaun sira ho di’ak no kualidade.

Merício Juvinal dos Reis ‘Akara’ hateten lia hirak ne’e bainhira hala’o enkontru ho Embaixadór Portugal iha Timor-Leste, Pedro Machado Vieira, no Koordenadora Konsultóriu Lian ba Jornalista (CLJ-sigla portugés), Claúdia Taveira, liuhosi enkontru avaliasaun ba implementasaun formasaun Lian Portugués ba jornalista sira iha Timor-Leste.

Sekertáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Francisco Sony.

“Enkontru ne’e hanesan parte ida atu halo avaliasaun kona-ba kooperasaun ne’ebé durante ne’e ita halo ho Institutu Camões liuhosi Embaixada Portugál iha ne’e. Projetu ne’e hahú iha 2016 ne’ebé foka ba formasaun lingua portugés ba jornalista sira, liu-liu oinsá jornalista bele hakerek notisia iha lian portugés ho di’ak, kualidade no kapaas,” Merício Juvinal dos Reis ‘Akara’ hateten ba jornalista sira iha Sala Reuniaun SEKOMS, iha Palásiu Governu, Dili, kuarta ne’e.

 Iha enkontru ne’e, Koordenadora Konsultóriu Lian ba Jornalista (CLJ-sigla portugés), Claúdia Taveira, informa katak prosesu la’o di’ak no iha progresu kuaze jornalista hamutuk 200-resin mak sai benefisiáriu ba projetu ne’e, no rezultadu hatudu katak sira hakerek notisia iha lian portugés ho di’ak.

Maske jornalista sira hakerek notisia iha lian portugués seida’uk 100%, maibé bele dehan katak jornalista timor-oan ne’ebé partisipa iha projetu ne’e, kuaze sira hakerek notisia di’ak ho porsentu 80% no hela uitoan tan sira bele hakerek di’ak loos.

“Projetu ne’e sei kontinua. Tuir avaliasaun Institutu Camões mós hakarak, ita halo no espera to’o 2023. Bainhira projetu ne’e ita finaliza, jornalista sira maioria bele iha ona kapasidade halo notisia iha lian portugés,” nia dehan.

Alende kapasita jornalista iha lian portugués, SEKOMS mós sei kapasita jornalista iha formasaun tékniku, hanesan oinsá jornalista iha kapasidade iha área finansa, matématika, inklui setór sira seluk.

“Itaboot (jornalista) sira sei halo kobertura ba setór sira-ne’e hotu. Entaun, projetu ne’e fó formasaun tékniku no konabá lian mós, atu nune’e bele hakerek lían portugés ho di’ak,” nia hateten.

Embaixadór Portugal iha Timor-Leste, José Pedro Machado Vieira, hateten apoiu hosi Sekretáriu Estadu ba Komunikasaun Sosiál, Merício Juvinal dos Reis “AKARA” ba extensaun projetu kooperasaun entre Governu Timor-Leste ho Institutu Camõens, liu-liu iha Konsultóriu Lian ba Jornalista (CLJ-sigla portugués).

“Orgaun komunikasaun sosiál hotu-hotu iha papel fundamentál no dezenpeña hodi informa ba sidadaun sira ho krítiku,” José Pedro Machado Vieira hateten.

Polítiku labele interven

Aleinde ne’e, Merício Juvinal dos Reis ‘Akara’, husu polítika na’in sira labele interven iha sala redasaun tanba Liberdade imprensa nia xave mak iha konsellu redasaun liu-liu notísia sira iha ámbitu Eleisaun Prezidensiál tinan 2022       .

“Ha’u fó hanoin ona ba ema hotuhotu atu labele halo intervensaun imediata ba iha Konsellu Redasaun. Labele halo intervensaun signifika kualker intervensaun, hanesan intervensaun ba polítika, ekonómia no finanseiru, tanba ita liberdade Imprensa nia xave mak husik konsellu redasaun mak deside hodi hatun notísia,” nia hateten.

Konsellu redasaun mak sei deside saida no konteudu notísia ida-ne’ebé mak merese atu hatun, ida-ne’e depende ba konsellu redasaun no kualker saida de’it labele halo ida-ne’e. Polítiku na’in sira la konkorda karik bele halo direitu de resposta, maibé labele halo intervensaun iha konsellu redasaun. 

Nia hateten, liu-liu besik ona eleisaun prezidensiál 2022 no dalan úniku mak labele halo intervensaun ba sala redasaun iha kualker mídia, hanesan média Estadu no privadu sira.

“Husik sira mak deside atu ba kobertura iha ne’ebé, kobertura (liput) oinsá, hakerek oinsá no hatun konteudu hanesan ne’ebé ne’e, depende sira-nia polítika editoriál. Maibé, ita la kontente ho sirania konteudu karik, ita halo de’it mak direitu de resposta,” Governante ne’e esplika.

Entretantu, iha loron 11 fulan outubru tinan ne’e, Komisaun Nasionál Eleisaum (CNE-sigla portugués) hala’o ona enkontru dahuluk ho Autoridade Munisípiu Dili hodi ko’alia kona-bá preparasaun eleisaun prezidensiál ne’ebé sei akontese iha tinan 2022.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here