Formasaun ba estudante sekundáriu 04 setembru no Calixa Boromatan, iha salaun edukasaun Viqueque, kuarta (17/11). Imajen TATOLI/Vitorino Lopes da Costa

VIQUEQUE, 17 novenbru 2021 (TATOLI)-Sekretaria Estadu Igualdade no Inkluzasaun (SEII) no Uniaun Nasionál Eskuteiru Timor-Leste (UNE-TL) realiza formasaun durante loron-tolu, kona-ba ‘lian kontra violénsia’ ba estudante sekundáriu 04 setembru no Calixa Boromatan iha Viqueque.

Xefe Komisáriu UNE-TL Viqueque, Hermigildo Pereira, hateten, uniaun ne’e iha knaar atu transmite informasaun prevensaun violénsia, tanba ne’e objetivu atividade ne’e atu hasa’e koñesimentu joven atu redús violénsia hasoru feto no labarik feto.

“Ita-nia estudante ne’ebé tuir formasaun ne’e kuaze membru UNE-TL,” Hermigildo Pereira hateten ba Agência TATOLI, iha salaun edukasaun Viqueque, kuarta ne’e.

Formadór hosi Konsellu Nasionál no munisípiu Viqueque, ne’ebé sei introdúz área prevensaun violénsia hasoru feto no labarik feto.

Atividade ne’e hetan apoiu finaseiru hosi UN Women liuhosi programa spotlight.

Iha fatin hanesan, Administradór Viqueque, Januário Soares ‘Boly’, hateten, formasaun ne’e nu’udar parte ida atu motiva joven sira kria páz iha sosiadade nia le’et.

“Ha’u agradese ba SEII no UNE-TL tanba bele realiza formasaun ba ita-nia estudante, hanesan previléjiu ida, aleinde aprende iha eskola, aprende mós iha organizasaun hodi hadi’a estudante nia komportamentu sai di’ak liu. Tanba ne’e, ha’u husu ba estudante sira atu partisipa ho boa vontade hodi aprende,” nia dehan.

Nune’e mós, Diretór Edukasaun munisípiu Viqueque, Emidio Amaral, hateten, atividade UNE-TL iha Viqueque, kuaze la’o iha postu lima tanba Ministériu Edukasaun Juventude no Desportu (MEJD) maka fó orientasaun, hahú tinan 2016, eskola primária to’o sekundária tenke partisipa hotu formasaun ba área ne’e.

“Ha’u husu imi tenke tuir ho di’ak hodi hatutan ba maluk sira seluk,” nia hameno.

Formasaun ne’e partisipa hosi estudante hamutuk 30-resin hosi eskola rua, ne’ebé atividade ne’e sei ramata iha loron 19 novembru.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here