Sentru viveru agrikultura RAEOA. Imajen Tatoli/Abílio Elo Nini.

OÉ-CUSSE, 17 novembru 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál Asuntu Agrikultura, hahú halo distribuisaun ai-oan hamutuk 1,620 iha faze dahuluk ba bee-matan 85 iha territoriu Oé-Cusse.

“Iha faze primeiru ita prepara 1,620 servisu agrikultura liuhosi departamentu floresta distribui ona ai-oan ho espésie 23 iha bee-matan haat, tanba iha tinan ne’e autoridade identifika ona bee-matan 85 atu halo konservasaun,” Sekretáriu Rejionál ba Asuntu Agrikultura, José Eta, informa ba Agência Tatoli iha Oe-Cusse, kuarta ne’e.

Autoriddae ne’e fó sai katak, atividade distribuisaun ne’e sei kontinua iha faze tuir mai, tanba servisu agrikultura hamutuk ho parseiru sira prepara ona ai-oan iha sentru viveru Oé-Cusse, hamutuk rihun 66 atu distribui ba bee-matan 85, tanba antes ne’e autoridade identifika ona, halo konservasaun, ba futuru Oé-Cusse labele akontese-tán krize bee-moos.

Nune’e ai-oan 1,620 ne’e atu distribui iha faze dahuluk mak, bee-matan Oélpan, suku Lela-Ufe, sub-rejiaun Nítibe ai-oan hamutuk 420, bee-matan Oémasin iha aldeia Oébaha, suku Bobometo, sub-rejiaun Oésilo hamutuk 400.

Bee-matan Nonosabuin iha aldeia Haemnanu, suku Abani, sub-rejiaun Pássabe hamutuk ai-oan 400, no bee-matan Oéltalan iha aldeia Maunaben, suku Cunha, sub-rejiaun Pante Makassar hamutuk 400.

Purtantu ai-oan 1,620 ne’e komposta hosi espésie 23 mak hanesan abokate, sabraka, samtuku, bua, au, rambutan, dragon, kamí, kakau, vetiver grass, mahoni, jambu, hali-portu, figus, ai-kameli, ai-nitas, kulu-jaka, malus, nimba no nú.

“Ita fahe iha faze daruak sei la’o, tanba iha bee-matan balu presiza halo lutu haleu no prepra ai-oan nia fatin, objetivu hosi kuda ai-oan atu konserva bee-matan no habokur rai fó fresku ba umanu, animál, no hamatak bee-matan sira, inklui hamenus erosaun, rai halai hodi fó bee ba bee-matan sira, nune’e ita tempu bailoron labele akontese-tán krize bee-moos iha komunidade” nia katak.

Jornalista         : Abílio Elo Nini

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here