Udan boot halo bee nakonu iha Rotunda Nicolao Lobato, hodi rezulta bee tama iha pista Aeroportu Internasional Comoro, iha segunda (15/11). Imajen TATOLI/António Gonçalves

DILI, 17 novembru 2021 (TATOLI)—Prezidente Komisaun E Trata Asuntu nfraestrutura, Abel Pires, husu Governu liu-liu Ministéiru Transporte Telekomunikasaun (MTK) atu fó atensaun ba inundasaun ne’ebé akontese iha aeroportu internasionál Nicolao Lobato, Comoro, ne’ebé iha loron hirak liu-ba bee nakonu iha pista impáktu hosi udan-boot.

Notísia Relevante: Aviaun Citilink ‘para’ kuaze oras ida iha Aeroportu Comoro

“Ida-ne’e akontese beibeik ona no fó sujestaun maibé rezultadu seidauk iha. Tanba ne’e ezije Ministéiru Transporte Telekomunikasaun (MTK) liu-liu autoridade Aeroportu hodi halo prevensaun,” Abel Pires hateten ba jornalista sira iha Parlamentu Nasionál, kuarta ne’e.

Nia hateten, iha situasaun COVID-19 ho restituisaun ba viajen internasionál ne’ebé impaktu ba sirkulasaun aviaun menus, nune’e ho inundasaun akontese ladún risku bainhira aviaun atu tun  maibé bainhira situasaun normál mak aviaun tun barak sei fó impáktu.

“Ami lamenta tebes prevensaun ba inundasaun iha aeroportu no hein iha tinan oin labele  haree situasaun hanesan ne’e, tanba hatudu preparasaun la másimu no krítiku ba ministéiru tutela,” nia dehan.

Ho situasaun ne’e, sempre hatudu infraestrutura estratéjiku ladún preparadu ba atividade ekonómiku ne’ebé makaas liután.

Iha loron 15 novembru ne’e, aviaun Citilink kuaze oras ida para de’it iha aeroportu Comoro, tanba bee nakonu iha pista impaktu hosi udan-boot iha oras balun nia-laran.

Prezidente Konsellu Administrasaun Aeroportu no Navegasaun Aéro Timor-Leste, Empreza Públika (ANATL, E.P), José Trindade da Cruz Pinto, hateten  aviaun Citilink tun iha aeroportu meiudia maibé atu fila-fali tarde tanba bee boot sa’e hosi rotunda Nicolao Lobato, mai tomak tama to’o aviaun nian para fatin laran.

Antes ne’e, iha balleta hodi lori bee sai, maibé balleta ne’e taka tiha entaun bee sai ladi’ak, nune’e aviaun labele halo operasaun.

Jornalista : Nelson de Sousa

Editór    : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here