MAP-FAO realiza enkontru koordenasaun ho liña ministeriál sira iha munisípiu Bobobaro. Imajen Tatoli/Sérgio da Cruz.

BOBONARO, 17 novembru 2021 (TATOLI) – Ministériu Agrikultura no Peska (MAP) liuhosi Diresaun Nasionál Seguransa Alimentár, servisu hamutuk Food Agriculture Organization (FAO), kuarta ne’e diskute planu pereparasaun ba implementasaun programa integradu seguranasa ai-han no nutrisaun iha suku Piloto Daudu, postu administrativu Cailaco, munisípiu Bobonaro.

Diretór Nasionál ba Seguransa Alimentár, Rofinos Soares Gusmão, hateten enkontru ne’e atu konsolida no tau planu hamutuk ho liña ministeriál sira hotu nune’e implementasaun atividade nune’e la’o ho susesu iha suku refere. 

Diretór Nasionál Seguransa Alimentár Sekretariadu KONSANTIL, Rofinos Soares Gusmão. Imajen Tatoli/Sérgio da Cruz.

“Ita ko’alia kona-ba asuntu seguransa ai-han no má-nutrisaun presiza multi-setoriál sira-nia intervensaun hodi responde ba situasaun má-nutrisaun ne’ebé mak Timor-Leste sei rejista 46 % ka 47% komapara ho nasaun sira seluk,” nia informa ba Agência TATOLI, iha salaun Cruz Vermelha Timor-Leste Filiál Bobonaro, kuarta ne’e.

Tuir nia, problema inseguransa ai-han no ma-nutrisaun akontese ba labarik no inan isin-rua sira, tanba hasoru difikuldade kona-ba estrada, bee-moos, saúde, falta informasaun kona-ba kualidade produtu ai-han lokál ne’ebé iha valor nutrisaun di’ak ba kresimentu isin.

Ho nune’e nia dehan, presiza sensiblizasaun informasaun kle’an ba komunidade sira atu konsume ai-han lokál nutritivu, atu labele depende liu bá produtu importasaun.

Nia fiar katak Governu ho parseiru dezenvolvimentu sira investe hela, atu bele redús má-nutrisaun iha Timor-Leste.

Nia fó ezemplu, iha suku ida, implementa ona produsaun modo no ai-fuan entaun suku seluk aproveita habelar informasaun kona-ba ai-han ne’ebé kuda no prodús rasik.

“Tanba prosesu fila-rai to’o kolleta ita akompaña katak ai-han ne’e nutritivu tebes, ne’ebé la fó impaktu negativu ba ita-nia isin,” nia esplika.

Iha fatin hanesan, Diretór Servisu Agrikultura no Peska Munisípiu Bobonaro, Alberto Gomes Lopez, hateten, atu hakotu problema inseguransa ai-han papél agrikultura nian mak hasa’e produsaun agríkola hodi responde ba komunidade sira-nia nesesidade uma-laran. 

Diretór Servisu Agrikultura no Peska Munisípiu Bobonaro, Alberto da Costa Lopes. Imajen Tatoli/Sérgio da Cruz.

“Preparasaun agrikultura nian iha buat rua, primeiru ai-han primária, segundu atu subtitui ai-han primaria ne’e mak saida, entaun ita sei sosializa ai-han lokál sira hanesan kumbili, talas, kontas. Ne’e ita tenke dezenvolve beibeik atu iha momentu ita-nia ai-han prima tempu ruma menus bele subtitui ai-han lokál sira ne’e,” nia subliña.

Enkuantu tuir dadus hosi Organizasaun Mundiál Alimentár no Organizasaun Mundiál Saúde (OMS) hatudu katak populasaun Timor-Leste 30% korresponde ho 400.000 populasaun enfrenta inseguransa ai-han grave.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here