Abitante iha mota-ibun Ponte Comoro III sai vitima ba impaktu inundasaun iha domingu (04/04). Imajen TATOLI/António Gonçalves.

DILI, 17 novembru 2021 (TATOLI)—Prezidente Komisaun E Trata Asuntu Infraestrutura, Abel Pires, husu Governu liuhosi instituisaun relevante atu kontinua tau atensaun ba fatin risku dezastre no hasai sedimentasaun iha mota laran hodi prevene inundasaun.

“Agora ita tempu udan, nafatin husu Ministéiru Obras Públika (MOP), Institutu Jestaun Ekipamentu (IJE) atu kontinua tau atensaun ba fatin risku dezastre sira hanesan mota ninin sira iha parte Dili,” Abel Pires hateten ba jornalista sira iha Parlamentu Nasionál, kuarta ne’e.

Tuir observasaun komisaun nian, durante ne’e iha ona intervensaun imediatu sira daudaun iha faze rekuperasaun estragu hosi dezastre iha 04 abríl liu-bá, maske nune’e iha fatin balun seida’uk hadi’a no ida-ne’e fó risku.

Tanba ne’e, Komisan E nafatin husu ba parte kompetente sira atu halo preparasaun di’ak liután, tanba Timor-Leste tama hela époka la-niña ne’ebé ho intensidade udan no anin bo’ot sei mosuiha Timor-Leste.

Preparasaun seluk ne’ebé Governu hato’o alerta bebe’ik hodi fó hanoin kona-ba posebilidade situasaun udan no anin boot sei akontese tinan ne’e to’o iha tinan oin mai (2022).

Nia husu ba populasaun atu kontribui liu-liu ema hirak ne’ebé hela besik iha fatin risku dezastre hanesan foho lolon, mota ninin, iha udan boot dook sees hosi fatin ne’e hodi salva moris antes mosu dezastre tanba iha dezastre ne’ebé akontese liu-ba sai ona lisaun boot.

“Governu iha ona preparasaun sira ho dezastre sira-ne’ebé akontese liu-bá, nune’e husu komunidade hotu nia kontribuisaun,” nia dehan.

Reprezentante povu ne’e, hein katak planu di’ak Governu atu harii fatin sentru akollamentu ne’ebé daudaun iha ona faze identifikasaun rai. Hein katak, prosesu atu halo konstrusaun lais liután, nune’e preparadu atende ba kualker dezastre ne’ebé atu mosu.

Hafoin inundasaun iha loron 04 abríl 2021, ema hamutuk na’in-34 mak mate no na’in-14 mak lakon iha nivél nasionál, família hamutuk 30.322 mak afeta ba inundasaun, ne’ebé entre família sira-ne’e, família 24.816 hosi munisípiu Dili no uma hamutuk 4.231 mak hetan estragu totál.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here