Vise-Ministru Interiór, Antonio Armindo, akompaña grupu arte-marsiál no rituá, halo kompromisu hametin fraternidade. Imajen/ mídia MI.

DILI, 17 novembru 2021 (TATOLI)– Ministériu Interiór liuhosi Diresaun Nasionál Prevensaun Konflitu Komunitária (DNPKK), serbisu hamutuk ho g+7 realiza programa diálogu no rekonsiliasaun entre grupu arte-marsiál no rituál kompostu husi PSHT, IKS, KORK no 77, 55, Kolimau, THS-THM halo mediasaun iha nivél komunitária, iha Suku Aidaba-Leten, Postu Administrativu Atabae, Munisípiu Bobonaro.

Biban ne’e, Vise-Ministru Interiór, Antonio Armindo, ne’ebé sai sasin ba juramentu Grupu Arte Marsiál no Arte Rituál, husu atu ema hotu kumpre juramentu ne’ebé halo hodi hadook an hosi violénsia.

“Ita sai sasin ba serimónia rituál no dame malu entre Grupu Arte Marsiál no Arte Rituál iha fatin ida-ne’e liuhosi juramentu ba bandeira lulik RDTL no Maromak katak hahú hosi loron 16 novembru 2021, prontu lolo liman ba malu hodi simu no dame malu hanesan maun alin. Tanba ne’e tenke loyál ba komprimisiu ne’ebé halo ona hodi hametin nafatin unidade no fraternidade,” Vise Ministru Interiór, hateten liuhosi nota ne’ebé Agência TATOLI asesu, kuarta ne’e.

Governante ne’e, konsidera juramentu ne’e importante atu joven-sira kumpre akordu ne’e no labele uza tan kro’at hodi ameasa malu tanba kualker aktu violénsia sei prosesa tuir lei ne’ebé vigora iha Timór-Leste.

“Ita hotu entende katak modalidade arte marsiál nia pratika ohin loron iha mundu rai klaran ninia orientasaun ba liu desportivu ho objetivu prinsipál maka kompetisaun enkuantu arte rituál iha ninia pratika maka defeza pesoál liuhusi asaun rituál ho esénsia halo kalma isin (fiziku) no klamar (espirituál),” Governante ne’e akresenta.

Tanba ne’e, Governu iha ona inisiativa no buka dalan hodi formaliza no halo reajustamentu ba estrutura GAM, nune’e iha futuru bele sai hanesan arte desportu ida.

Vise Ministru Interiór ne’e husu ba GAM no arte rituál sira hotu atu asegura pás no estabilidade hodi kontribui ba prosesu dezenvolvimentu iha Timór-Leste.

“Eventu ida-ne’e fanun ita atu hanoin ona katak unidade tenke hahú iha fatin ida-ne’e. Tanba ne’e ha’u husu ba Grupu Arte Marsiál hotu iha timór laran tomak atu hametin espíritu joventude nian labele iha tán konfrontasaun, maibé buka esforsu an atu hadia moris no hametin liután unidade tanba ho nune’e maka bele kria pás no estabilidade iha suku ida-ne’e no mós nasaun kiik ida-ne’e,” nia enkoraja.

Serimónia diálogu no rekonsiliasaun entre eis Grupu Arte Marsiál no Arte Rituál ne’e hetan mós partisipasaun hosi Komandante Komandu PNTL Munisípiu Bobonaro, Superintendente Polísia, Antonio Mauluta, Administradór Postu Atabae, Lino Tavares, Diretór Operasionál g7+, Felis Piedade, Prezidente Komisaun Reguladora Arte-Marsiál (KRAM), Octaviano da Conceição, Diretór Nasionál DNPKK, Antonio Viegas, Komandante Bombeiru Maliana, Vitorino Lopes, Komandante BOP COP, Rosalino dos Santos, Autoridade lokál, veteranu no bainaka importante seluk iha suku Atabae nia laran.

Jornalista : Natalino Costa

Editór       : Florencio Miranda Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here