Governu liuhosi Ministru Administrasaun Estatal (MAE), Miguel Pereira de Carvalho, kuarta ne’e inaugura Uma Kbiit Laek iha aldeia Batumigi, suku Malabe-Ermera. Imajen/Espesiál.

DILI, 17 novembru 2021 (TATOLI)—Governu liuhosi Ministru Administrasaun Estatal (MAE), Miguel Pereira de Carvalho, kuarta ne’e inaugura Uma Kbiit Laek iha aldeia Batumigi, suku Malabe, postu administrativu Atsabe, mMunisípiu Ermera.

Notísia Relevante: Konstrusaun ‘Uma Kbiit Laek’ iha munisípiu 12 atinje ona 25%

“Ohin loron hamutuk ho ekipa sira atu hare’e direta susesu implementasaun uma ba família kbiit laek ne’ebé Governu halo liuhosi implementasaun programa PNDS. Ohina loron ramata no obrigasaun hosi Governu mak atu garante nia populasaun sira bele hetan fatin ne’ebé di’ak no dignu,” Miguel Pereira de Carvalho hateten liuhosi komunikadu imprensa ne’ebé Agência Tatoli asesu, kuarte ne’e.

Governante ne’e heteten, Governu espera ninia povu sira bele kontente ho saida mak Estadu halo no fó ba sira, atu nune’e bele tau matan mós ba oan sira.

Vise Komisaun E Parlamentu Nasional (PN) ne’ebé trata Asuntu Infraestrutura, Fabião Oliveira, apresia no kontente tanba konstrusaun uma ba família kbiit laek ne’e benefisiu direta ba komunidade rasik.

Konstrusan Uma Kbiit Laek iha aldeia Batumigi, suku Malabe. Imajen/Espesiál.

Iha tinan oin sei injeta luta nafatin atu aumenta osan ba iha konstrusaun ba uma kbiit laek ba ema kbiit laek sira, tanba konstrusaun ne’e la’ós hosi emprezáriu públik sira maibe konstrusaun ne’e konstrui hosi joven no komunidade sira hodi konstrui uma ba familia kbiit laek ne’ebé dignu.

Benefisiáriu ba Uma Kbiit Laek, Pedro Monteiro, hateten nu’udar ema kbiit laek sente kontente no agradese ba Governu ne’ebé fasilita uma ne’ebé di’ak ba nia familia.

Konstrusaun Uma Kbiit Laek ba familia kbi’it laek ne’ebé Governu halo liuhosi Programa Nasionál Dezenvolvimentu Suku iha suku Malabe hamutuk uma tolu ho tipuu 48m2 ho kuartu tolu, sala vizita ida, dapur ida ho haris fatin ida.

Entretantu, serimónia inaugurasaun ne’e partisipa hosi Ministru Administrasaun Estatál, Provedaria hosi PDHJ, Vise Komisaun E Parlamentu Nasional, Prezidente Autoridade Munisipál Ermera, Diretora ST-PNDS, Xefe Gabinete Hosi MAE, Xefe Gabinete Premeiru-Ministru, Diretór Delegasaun Munisípiu Ermera, Funsionáriu PNDS, Autoridade Lokál Postu Atsabe no komunidade suku Atsabe.

Programa Nasionál Dezenvolvimentu Suku (PNDS), Autoridade Munisipál Ermera, iha Orsamentu Jerál Estadu 2021 hetan alokasaun orsamentu hamutuk tokon $4,1 hodi implementa Programa Nasionál Dezenvolvimentu Suku (PNDS).

Ba PNDS-Regular, Autoridade Munisipál Ermera hetan alokasaun orsamentu hosi Programa PNDS-Regular hamutuk tokon $1,2. Hosi totál ne’e atu finansia ba atividades fiziku hamutuk tokon $1,1 ba suku 24 no resta rihun $143,250 ba kustu operasionál.

Iha PNDS-Uma Kbiit Laek (UKL), Autoridade Munisipál Ermera hetan alokasaun orsamentu hosi Programa PNDS-UKL hamutuk tokon $2.8. Hosi totál ne’e atu finansia ba atividade fiziku hamutuk tokon $2.7 ba suku 8 (aldeia 156), operasionál rihun $156,000 no fee ba BNCTL rihun $5,616.

Ba PNDS-Reabilitasaun, Autoridade Munisipál Eremera tinan 2021 hetan alokasaun orsamentu ba Programa PNDS-Rehabilitasaun hamutuk rihun $118,598. Hosi tetu ne’e aloka ba atividade fiziku hamutuk rihun $105,420 ba suku ualu (8) no resta $13,178 aloka ba kustu operasionál.

Tuir mapa hatudu katak pozisaun jeográfika Autoridade Munisipál Ermera iha luan 746 km² ho populasaun na’in 117,064 tuir Sensus 2015.  Ne’e hatudu Autoridade Munisipál Ermera iha Postuu Administrativu lima (5) ho sukus 52 no aldeia 277.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here