Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, kuarta (17/11). Imajen TATOLI/Francisco Sony

DILI, 17 novembru 2021 (TATOLI)—Ministru Obra Públika, Salvador Eugênio Soares dos Reis Pires, aprezenta projetu deliberasaun iha reuniaun Konsellu Ministru (KM) no hetan aprovasaun, kona-ba atu modifika folin no prazu entrega obra infraestrutura, maibé tenke halo tuir lei no kontratu.

Tuir Ministru Prezidénsia Konsellu Ministru, Fidelis Manuel Leite Magalhães, desizaun ne’e ba realizasaun obra reabilitasaun no manutensaun estrada Ermera-Fatubesi, iha munisípiu Ermera.

“Razaun Governu deside laiha objesaun atu modifika folin no prazu entrega obra ne’e, la’ós la limita, maibé aumentu tempu de’it hosi kontratu inisiál tanba iha implementasaun hasoru dezafiu sira ne’ebé liga ho difikuldade atu movimenta sasán no iha problema balun tanba aumentu kuantidade bee tanba udan, ne’ebé liga mós ba konfinamentu domisiliáriu,” Ministru Prezidénsia Konsellu Ministru relata, hafoin reuniaun ezekutivu, iha Palásiu Governu, kuarta ne’e.

Tuir Portavóz Governu, kestaun hirak ne’e hotu sai impaktu negativu ba finalizasaun obra, nune’e Governu deside husu atu aumenta tan tempu atubele finaliza obra ne’ebé sira halo.

Notísia relevante: Estrada Aipelu-Bazartete no Ermera-Fatubessi, Lansa Ona Fatuk Dahuluk

Iha loron 12 outubru 2018, Governu liuhosi Ministériu Obra Públika (MOP) lansa fatuk dahuluk ba reabilitasaun estrada hosi Prizaun Aipelo, liga ho estrada Bazartete munisípiu Liquiçá no konstrusaun estrada Ermera liga ho suku Fatubessi, postu Hatulia, munisípiu Ermera.

Reabilitasaun ba estrada Prizaun Aipelo-Bazartete ho distánsia kilómetru 13,5, ho kustu $5.083.696,15, ho durasaun tempu reabilitasaun hahú hosi loron 18 maiu 2018 to’o loron 17 novembru 2019.

Enkuantu, estrada Ermera-Fatubessi ho distánsia kilómetru 11,81, ho kustu $4.294.350,60, ho durasaun tempu reabilitasaun hahú hosi 18 jullu 2018 to’o 17 novembru 2019.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here