Prezidente IPB-KRXG, Acácio Cardoso Amaral. Imajen TATOLI/Egas Cristóvão

DILI, 17 novembru 2021 (TATOLI)–Estudante Universidade Oriental (UNITAL) no Institutu Politékniku Betano Kay Rala Xanana Gusmão (IPB-KRXG) hamutuk 5.716 lakon direitu ba inzensaun propina tanba to’o agora la halo konfirmasaun ho universidade.

Prezidente IPB-KRXG, Acácio Cardoso Amaral, hateten, molok ne’e parte universidade haruka ona dadus estudante ba Ministériu Ensinu Superiór, Siénsia no Kultura (MESSK) hamutuk 419.

“Bazeia ba dadus ne’ebé ita relata, Governu halo transferénsia osan mai konta bankária universidade ho montante $10.578 atu halo pagamentu propina ba estudante 419, maibé osan ne’e ita la ezekuta hotu tanba estudante 381 de’it mak sai benefisiáriu, enkuantu na’in-38 laiha informasaun to’o agora,” Jerente institutu ne’e informa ba Agência TATOLI, iha resintu Universidade Nasional Timor Lorosa’e (UNTL), kuarta ne’e.

Nune’e, osan ne’ebé IPB simu ezekuta de’it $9.462 ba estudante benefisiáriu 381, enkuantu osan restu $1.116 sei devolve fali ba kofre Estadu.

Tanba ne’e, seremónia asina akordu ba inzensaun propina ba faze daruak, IPB mantein ho númeru ne’ebé iha.

Notísia relevante: Estudante 34.307 hosi universidade 16 simu inzensaun propina faze daruak

Iha sorin seluk, Reitór UNITAL, Florindo Pereira, hateten, hafoin atualiza dadus, parte universidade mantein ho totál númeru estudante 2.939 ba faze daruak, ne’ebé númeru ne’e mak sai benefisiáriu iha inzensaun propina faze dahuluk.

“Ita simu totál osan transferénsia hosi Governu hamutuk $824.280 atu ezekuta ba estudante hamutuk 8.271, maibé iha prosesu, estudante 2.939 de’it mak asesu ba pagamentu propina, enkuantu estudante 5.335 lakon kontaktu to’o ohin loron,” nia dehan.

Tanba ne’e, totál osan $824.280 ne’ebé UNITAL simu hosi Ministériu Finansa, ezekuta de’it $226.955 no restu $557.325 sei devolve fali ba kofre Estadu.

Tuir diploma ministeriál númeru 34/2021 19 maiu, kona-ba prosedimentu inzensaun pagamentu propina hosi parte estudante ensinu Superiór nasionál, mensiona kada estudante benefisiáriu sei hetan izensaun propina $150 ba semestre ida ho prosedimentu ba estudante ne’ebé regularmente inskritu ka ativu iha tinan letivu 2021, iha kursu titulár lisensa, iha instituisaun ensinu superiór públika no privada akreditada, enkuantu ba estudante ne’ebé hetan ona bolsa estudu sei la sai benefisiáriu programa ne’e.

Aleinde ne’e, instituisaun ensinu Superiór ne’ebé sai befisiáriu ba programa tenke reembolsa ba estudante inskritu, valór propina to’o montante másimu $150.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here