Transporte publiku neebe halao operasaun Dili-Maliana halao hela kobransa ba pasaseirus iha area Tasibun Tasitolu. Imajen/Antonio Goncalves

BOBONARO,17 novembru 2021 (TATOLI) — Diretór Transporte Terrestre (DTT) Munisípiu Bobonaro, João Paulo Henrique Baptista, rejeita informasaun espalla iha mídia sosiál katak bís diresaun entre Maliana-Dili presu sa’e ba $8 kada pasajeiru.

“Informasaun dehan DTT Bobonaro autoriza ona bís Dili mai Maliana kada ema ida selu $8 ne’e lalooos. Ha’u husu ba públiku labele fiar tanba DNTT seidauk halo alterasaun ba mudansa tarifáriu anteriór $6 dolar,” João Paulo Baptista ko’alia iha Maliana, kuarta ne’e.

Iha loron 16 fulan-novembru, reprezentante motorista Dili-Maliana, konsege husu autorizasaun DTT Bobonaro atu halo mudansa ba tarifáriu, tanba presu kombustível sa’e iha kapitál Dili kada litru.

Maibé Diretór ne’e dehan, DTT Bobonaro laiha kompeténsia atu halo mudansa tarifáriu, tanba diploma ministeriál ho depaxu to’o agora seidauk halo mudansa iha territóriu nasionál, tanba ne’e nafatin mantein ho $6 dolar.

“Sira mai hato’o lamentasaun kona-ba folin mina sa’e halo sira la hetan rendimentu. Ha’u esplika ba ita-nia motorista sira-ne’e katak, folin mina ne’e la’ós ministériu transporte no komunikasaun no DNTT mak hasa’e, ida-ne’e ita hetan implikasaun presu mina iha merkadu mundiál mak implika to’o ita-nia rai, ne’ebe Governu seidauk bele halo mudansa tarifáriu iha tempu badak,” nia esplika. 

Diretór Transporte Terrestre (DTT) Munisípiu Bobonaro, João Paulo Henrique Baptista. Imajen Tatoli/Sérgio da Cruz.

Relasiona ho problema ne’e, parte DTT Bobonaro koordena ona ho Polísia Unidade Tránzitu Munisípiu Bobonaro, atu kolabora serbsiu hodi kontrola motorista ne’ebe kontra orden hosi hasa’e tarifáriu tuir sira-nia hakarak.

Nune’e mós DTT planeia ona atu tún ba terrenu hodi habelar informasaun kona-ba diploma miniateriál no depaixu ne’ebé governu hasai, ba publiku liuliu motorista no pasajeiru sira, atu labele kontra regra ne’ebe Governu fó-sai ona.

“Se ida-ne’e mak sira la kumpri, medida ne’ebé mak ami sei foti mak aplika sansaun selu multa, últimu ita sei hapara sira-nia lisensa operasaun tanba sira la obedese ona ba regra ne’ebé iha,” nia afirma.

Tuir dadus ne’ebé Diresaun Transporte Terrestre Munisípiu Bobonaro rejista hahú hosi 2020 até agora, auto carro ne’ebé halo operasaun diresaun Dili-Maliana hamutuk 32. Hosi númeru ne’e 28 mak sei ativu hela tula pasajeiru.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here