Koordenadór CIGC Baucau, Adolfo dias Marçal. Imajen Tatoli/Natalino Belo.

BAUCAU, 16 novembru 2021 (TATOLI) –  Sentru Intergradu Jestaun Krize (CIGC, sigla Portugés) sala situasaun Munisípiu Baucau nafatin monitoriza situasaun liuhosi fasilidade saúde bainhira deteta kazu Covid-19 iha Baucau.

Koordenadór Sentru Intergradu Jestaun Krize (CIGC, sigla Portugés) Baucau, Adolfo dias Marçal, hateten Baucau-oan tenke nafatin kuidadu-aan no kontinua mantein regra hosi Organizasaun Mundiál Saúde (OMS) no Ministériu Saúde (MS) nune’e uza nafatin maskára, prátika distansiamentu sosiál no fase-liman beibeik ho sabaun.

“Agora nafatin monitoriza iha fasilidade saúde hotuhotu iha Baucau laran no bainhira deteta kazu ruma CIGC halo aprosimasaun hodi deside izolamentu ka auto-kuarentena iha uma,” Koordenadór CIGC Baucau ne’e ko’alia Vila Nova, tersa ne’e.

Adolfo akresenta, kazu Covid-19 iha Baucau nia númeru menus tanba relasiona ho inisiativa no konsiénsia pesóal ne’ebé hahú komprende ona ne’ebé kontribui másimu númeru vasina sa’e inklui redus númeru kazu Covid-19.

Kona-ba pontu entrada iha postu Vemasse nafatin estabelese no ekipamentu kontinua mantein, mesmu ekipa liña frente provizoriumente retira tanba kumpri ba desizaun governu ne’ebé hakotu ona serka sanitária no konfinamentu obrigatóriu relasiona ho númeru kazu Covid-19 ne’ebé redus iha Baucau.

Munisípiu Baucau rejista kazu pozitivu Covid-19 na’in-rua iha loron 8 novembru kompostu feto idade 47 no iha loron 10 novembru deteta tán mane idade 65 bainhira atu halo tratamentu iha Ospitál Referal Eduardo Ximenes (HorEX,sigla Portugés) deteta iha sintoma covid-19 no rezultadu teste PCR pozitivu.

“Hafoin deteta iha HorEX ekipa vijilánsia hosi pilár 3 no 5 halo kedas aprosimasaun no deside auto izolamentu iha uma bainhira pilár 7 observa kondisaun uma,” Adolfo informa.

CIGC daudaun ne’e estabelese izolamentu rua hanesan eis SPK no Sentru saúde Ria-Mare vlla antiga.

Entretantu, tuir dadus Munisípiu Baucau dadaun ne’e totál komunidade ne’ebé partisipa vasina AstraZeneca doze dahuluk hamutuk 80.3% no doze daruak 49.8% hosi total alvu 73.313.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here