Comissão Anti-Corrupçã (CAC) no Polisia Nasional Timor Leste (PNTL) asinatura Nota Intendementu (MoU) ne’ebé sei kobre; Hametin Kooperasaun Intitusional hodi prevene, kombate no investiga kualker tipu krimi korrupsaun no krimi koneksu ne’ebé prejudika Estadu no povu Timor-Leste. iha Salaun Sentru Formasaun Akademia Polisia Comoro Dili (17/11). Imajen TATOLI/Egas Cristovão

DILI, 17 novembru 2021 (TATOLI)- Komisáriu Komisaun Anti-Korrupsaun (CAC,sigla Portugés), Sergio Hornai no Komandante Polísia Nasionál Timor-Leste (PNTL), Komisáriu Faustino da Costa, selebra akordu hodi mellora kooperasaun institusional ba prevene, kombate no investiga kualker tipu krime korrupsaun.

Objetivu prinsipál hosi MoU ne’e atu hametin lasu kooperasaun institusional ida forte, firme no efetivu entre CAC no PNTL hodi prevene, kombate no investiga kualker tipu krime  korrupsaun no krime koneksu ne’ebé prejudika Estadu no atu asegura utilizasaun rekursu téknika instituisaun seguransa Estadu nian PNTL hodi benefisiu povu iha área justisa nian no lori prosperiedade ba povu doben Timor-Leste.

“Ita asina nota ne’e atu hatudu tan katak institusaun rua (CAC no PNTL) hakarak kombate kriminalidade iha rai-laran, liuliu krime organizadu, krime korrupsaun sira, abuzu póder, krime pekulatu , krime partisipasaun ekonómia no modus operasaun sira seluk ba iha droga no tráfiku umanu,”Komisáriu CAC, Sergio Hornai, hateten iha ámbitu asina akordu,  iha Sentru Formasaun Polísia-Comoro  (CFP, sigla Portugés), kuarta ne’e.

Formalizasaun MoU ne’e, lider maksimu instituisaun Estadu nian CAC-PNTL konkorda atu utiliza hamutuk rekursu instalasaun propriu PNTL nian iha territóriu Timor laran tomak hanesan fasilidade téknika PNTL nian, troka informasaun ba malu, dezenvole kapasidade ofisiál sira nian iha nivél investigasaun hodi mellora prestasaun serbisu ho kualidade diak liután iha futuru.

Iha akordu ne’e mós kobre hala’o atividade hamutuk iha área ezersísiu fiziku, tékniku polisiál iha Sentru Formasaun Polisia Comoro Dili.

Klausula ambitu kooperasaun entre instituisaun CAC-PNTL iha MoU ne’e sei la prejudika no fó prejuizu ba misaun prinsipál instituisaun CAC no PNTL tuir lei.

“Ami konkorda iha MoU define iha materiál kooperasaun katak, CAC bele husu kolaborasaun instituisaun PNTL kona-ba kazu rekuza asesu ka obstrusaun, impedementu ba prosesu investigasaun membru PNTL bele fó seguransa ba serbisu investigasaun,” Komisáriu CAC ne’e akresenta.

Iha biban hanesan, Komandante Jerál PNTL, Komisáriu Faustino Da Costa, hateten, akordu ho CAC atu fortifika relasaun serbisu institusaun rua iha futuru liga ba kombate krime korupsaun sira.

“Ho kooperasaun ne’e ba oin PNTL sei halo serbisu hamutuk CAC  liuliu loron bo’ot sira sei halo operasaun konjuta hodi kontrola viatura públiku no kombate  krime korupsaun sira seluk,” Komisáriu Faustino hateten.

PNTL sei apoiu CAC halao inkeritu, sindikansia, peritajem, ezame ka delijensia ruma nesesáriu mezmu envolve membru PNTL. Partilha informasaun kriminál, uza hamutuk fasilidade téknika instituisaun PNTL nian hanesan laboratóriu.       

PNTL sei tulun CAC ba protesaun sasin nain no ema seluk ne’ebé kolabora ho CAC iha prosesu investigasaun criminal tuir lejislasaun Nu. 2/2009

Nune’e, CAC mós fornese informasaun anti-korrupsaun no integridade profesionál membru formador PNTL, hala’o atividade ezersisiu fiziku hamutuk ho tékniku polisiál iha Sentru Formasaun Polísia (CFP) no kontinua hala’o operasaun konjunta hodi fiskaliza utilizasaun viatura Estadu iha fim de semana no durante loron feriadu.

Iha MoU ne’e, hatu’ur mós klauzula implementasaun no konfidensialidade instituisaun nian iha ne’ebé durante implementasaun ofisiál parte rua iha obrigasaun obedese no hakruk ba. Kualker atividade relasiona ho implementasaun MoU ida ne’e kustu hotu CAC mak sei finansia no PNTL oferese rekursu materiál.

Akordu ne’e mós hatu’ur klauzula protesaun ba direitu ba propriedade inteletuál, lian komunikasaun, emenda, rezolusaun ba disputa, efeitu husi MoU, hahú vigora, durasaun, no terminasaun.

Estabelesimentu MoU entre CAC-PNTL atu hatudu ba povu Timor-Leste katak instituisaun rua tau problema korrupsaun iha kestaun sériu ne’ebé kontribui konsiekuensia negativu iha prosesu konstrusaun Estadu no impata dezenvolvimentu nasionál iha área hotu.

Partisipa iha serimonia asinatura MoU ne’e alende Senior Management CAC ho estrutura Espesialista Anti-Korrupsaun (EAK) partisipa mós Komandante PNTL Munisipiu 12, Komandante PNTL RAEOA, Komandante PNSIK, Komandante Maritima, Komandante UPF, Komandante BOP no Diretor CFP Comoro nu’udar uma nain.

 Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here