Labarik sira halimar no halo ezersísiu iha jardín Colmera. Imajen TATOLI/António Gonçalves

DILI, 16 novembru 2021 (TATOLI)–Governu Timor-Leste adopta Child Marker iha planu no orsamentu Estadu, ne’ebé programa ne’e sei tulun Governu hodi identifika no monitoriza atividade ho efetivu liután relasiona ba apoiu direitu labarik, ho objetivu hasa’e tranparénsia no responsabilidade.

“Child Marker hanesan instrumentu importante ida hodi ajuda ita asegura katak atividade sira foku ba labarik entre idade 0 to’o 17, ne’ebé justifika katak 43% hosi totál populasaun, simu sira-nia osan hanesan,” Primeiru-Ministru, Taur Matan Ruak, hateten liuhosi nota ne’ebé Agência TATOLI asesu, tersa ne’e.

Liuhosi programa ne’e, sei hatudu atividade saida mak Governu sei halo, alokasaun orsamentu, ne’ebé mai ho objetivu espesífiku atu responde ba direitu labarik no sei ajuda Governu hodi asegura orsamentu ne’ebé aloka ba justu no sei hatudu evidénsia ne’ebé forte hodi halo advokasia ba direitu labarik sira.

Komisária Direitu ba Labarik, Dinorah Granadeiro, hateten Gabinete Primeiru-Ministru no Komisaun Direitu Labarik dezenvolve Child Marker ho asisténsia téknika hosi UNICEF no objetivu hosi instrumentu ne’e tanba Timor-Leste iha kompromisu oferese informasaun ne’ebé kategoriza ona iha alokasaun orsamentu ba direitu labarik iha nível nasionál no lokál tuir saida mak hakerek ona iha Planu Asaun ba Labarik.

Child Marker hanesan aparellu vitál ne’ebé monitoriza kompromisu ne’ebé halo ona ba direitu labarik iha dokumentu polítiku sira.

Aleinde ne’e, hosi planu ne’e sei tulun sosiedade sivíl sira reprezenta labarik sira hodi halo advokasia.

Nune’e, programa ne’e integra ona iha sistema planu, monitorizasaun no avaliasaun Governu nian hanesan ‘Dalan ba Futuru’, nu’udar parte fundamentu hosi jestaun finanseira públika no bainhira dezenvolve planu no orsamentu anuál, ministériu no entidade seluk ne’ebé hetan finansiamentu hosi orsamentu Estadu sei simu kategoria atividade idaidak kona-ba Child Marker iha planu anuál.

Child Marker inklui kategoria tolu hanesan espesífiku, habelar, no indireita, ne’ebé mak foku liu ba avaliasaun ba implementasaun direitu labarik.

Reprezentante país UNICEF, Bilal Durrani, apresia ho vontade Timor-Leste ne’ebé hakat pasu ida tan hodi hasa’e responsabilidade no transparénsia iha finanseira públika.

“Inisiativa ne’e sei tulun Governu hodi garante polítika no planu asaun atu implementa duni, inklui Timor-Leste nia kompromisu ba realizasaun direitu labarik no muda sai rezultadu ba labarik timor-oan hotu,” nia dehan.

Child Marker hatudu Timor-Leste nia kompromisu ba implementasaun Konvensaun Nasaun Unida Direitu ba Labarik.

Komisaun Direitu ba Labarik rekomenda ona ba Timor-Leste desde tinan-2015 atu estabelese prosesu orsamentu ne’ebé inklui prespetiva direitu labarik no hatuur alokasaun detallu ba atividade hirak ne’ebé foka ba nesesidade labarik ba iha setór no ajénsia hirak ne’ebé relevante, inklui indikadór espesífiku no sistema identifikasaun, inklui oferese informasaun ne’ebé kategoriza ona iha porsaun ba orsamentu nasionál alokadu ba implementasaun direitu labarik iha nível nasionál no lokál.

Jornalista : Antónia Gusmão

Editora       : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here