Sekretária Estadu Igualdade no Inklusaun, Maria Jose da Fonseca Monteiro de Jesus. Imajen TATOLI/ Egas Cristovão

DILI, 16 novembru 2021 (TATOLI)—Sekretária Estadu Igualdade no Inkluzaun (SEII), tersa ne’e hala’o enkontru regulár ho Grupu Traballu Jéneru Interministérial, ho objetivu hodi promove igualdade no inkluzaun iha grupu traballu jéneru interministérial.

“Sorumutu ne’e, ita iha grupu traballu jéneru nasionál no grupu traballu jéneru munisípál. Nune’e, iha grupu traballu jéneru interministeriál ne’e ita lori hamutuk grupu traballu jéneru rua ne’e mai hodi atualiza servisu ba malu hotu iha grupu traballu jéneru idakidak ne’ebé halo iha nível nasionál no munisípiu hodi halo esforsu sira ba promosaun igualdade no inklusaun iha idaidak nia área ho kobertura oioin ne’ebé portofoliu idaidak nian,” Sekretária Estadu Igualdade no Inkluzaun (SEII), Maria Jose da Fonseca Monteiro de Jesus, hateten ba jornalista sira, iha Salaun Delta Nova, Díli, ohin.

Enkontru ne’e, oinsá atu asegura esforsu SEII nian hotu hodi halakon dezigualdade no diskriminasaun oioin ne’ebé komponente barak, hanesan sosiedade feto, labarik feto, labarik mane no maluk sira hosi portadór defisiénsia, ferik no katuas, inklui maluk sira hosi komunidade LGBTI kontinua hasoru iha sirania moris loroloron.

“Hosi ne’e ita bele fó hanoin ba malu, oinsá ita bele halo di’ak liután iha itania servisu sira hodi bele halo promosaun ba igualdade no inkluzaun ida di’akliu,” nia dehan.

Oinsá polítika SEII nian atu enkoraza feto partisipa iha vida polítika, nia hatán, SEII iha asosiasaun feto potensiál iha munisípiu sira hotu hanesan iha grupu traballu jéneru munisipál sira hodi bele asegura katak idakidak hala’o nia servisu hodi ba servisu hamutuk ho asosiasaun feto potensiál sira no iha sentru empoderamentu ba igualdade no inkluzaun sosiál ne’ebé estabelese iha tinan kotuku.

Alende ne’e, SEII servisu ho parseiru sira hosi sosiedade sivil, halo sensibilizasaun no preparativu sira hodi bele asegura katak SEII enkoraja feto sira atu ba partisipa ativu iha prosesu eleitorál tomak iha eleisaun oioin ne’ebé sei mai, la’os atu ba hili ema de’it maibé enkoraja sira atu bele brani ba hasoru pozisaun oioin iha eleisaun prezidensiál ne’ebé mai.

“Feto bele kandidata an ba Prezidente Repúblika. Nune’e mós, iha eleisaun Parlamentar mós ita servisu hamutuk ho partidu polítiku sira atu asegura katak persentazen feto iha lista kandidatura ba iha parlamentar bele sa’e no ita nafatin iha komunikasaun ho partidu polítiku sira atu asegura katak iha Governasaun tuir mai persentazen feto ba iha ezekutivu bele aas,” nia afirma.

Iha sorin seluk, Administradór Munisípiu Líqca, Pedro Paulo Gomes, hateten ko’alia konaba atividade sira-ne’e dahuluk ko’alia konaba direitu no dever, atu nune’e feto no mane maske iha igualdade, maibé nia partisipasaun iha dezenvolvimentu ba iha atividade ne’ebé selebra iha munisípiu tantu iha nasionál sirania direitu tenke hanesan.

“Maske tuir itania konstituisaun aprova ona iha Parlamentu Nasionál katak feto tenke iha 30% partisipasaun iha estrutura Estadu nian tomak iha munisípiu,” nia hateten.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here