Sekretáriu Estadu Ambiente, Deométrio de Amaral do Carvalho. Imajen TATOLI/Egas Cristóvão.

DILI, 16 novembru 2021 (TATOLI)—Sekretária Estadu Ambiente (SEA) lideradu Deométrio do Amaral do Carvalho, prioritiza programa boot rua (2) hanesan boa-governasaun no jestaun instituisionál ho protesaun no konservasaun ambiente iha proposta Orsamentu Jerál Estadu (OJE) 2022.

“Iha 2022, SEA hetan alokasaun orsamentu millaun $2.4 hodi implementa programa rua ne’e,” Deométrio do Amaral do Carvalho hateten ba jornalista sira hafoin halo audiénsia públika ho komisaun D Parlamentu Nasionál iha Parlamentu Nasionál, tersa ne’e.

Governante ne’e hateten, orsamentu ne’e define ba ambiente nu’udar rezilénsia hasoru dezastre sira hosi indusaun klimátika, tanba ne’e Timor-Leste (TL) presiza konsidera prioridade nasionál.

OJE 2022, SEA prevee $2,433,796 hodi aloka ba saláriu vensimentu $ 719,676, bens servisu $1,271,820, kapitál menór $177,300, kapitál dezenvolvimentu laiha, transferénsia públika $265,000.

Hosi orsamentu ne’e hodi finansia programa rua (2), sub-porgama ualu (8) no atividade 20.

Nia dehan, orsamentu ne’e la sufisiente atu implementa atividade ne’ebé hanoin atu realiza iha área ambiente, nune’e antes ne’e iha pedidu proposta husu tan millaun $2-resin iha Komite Revizaun Orsamentu Polítika (KROP) maibé la hetan aprovasaun.

Tan ne’e, nia dehan, liuhosi audénsia públika ba proposta OJE 2022 ne’e, SEA hato’o situasaun refere oinsá bele konsidera hodi garante servisu bele fornese kondisaun ambiente ba TL hanesan atu konstrui sentru tratamentu óleu fo’er iha Betano no reabilita sentru tratamentu óleu fo’er iha Tibar no atividade seluk.

Iha audiénsia públika ne’e, SEA relata progresu ezekusaun OJE 2021 ne’ebé atinji ona 67,45%, ne’ebé ezekuta ba programa sira-ne’ebé atribui hanesan avaliasaun vunerabilidade integradu iha suku iha territóriu nune’e bele iha mapa hasoru altersaun klimátika, asaun emite lisensa ambientál, kapitaliza fundu internasionál barak mai TL hosi ajénsia nasionál dezignadu ne’ebé harii ona no atividade sira seluk.

Programa bazea ba orsamentu

Tuir dokumentu livru 2 planu anuál OJE 2022 SEA ho programa boa-governasaun no jestaun instituisional sei gasta $1,234,773 no programa protesaun no konservasaun ambiente sei gasta $1,199,023.

Programa protesaun no konservasaun ambiente ho objetivu médiu prazu ambiente ho protejidu. Programa ne’e, ho nia sub-programa edukasaun ambiental no atividade formasaun ambiental, laboratóriu ambientál.

Sub-programa konservasaun biodiversidade nia atividade konservasaun sitíu ex-sitiu, promove modelu uzu sustentavél rekursu biodiversidade, rekuperasaun ka reabilitasaun ekosistema krítiku.

Sub-programa altesaun klimátika no ozonu ho nia atividade kontinua implementa programa avaliasaun vunerabilidade integradu nível suku, aumenta reziliénsia alterasaun klimátika liu asaun adaptasaun no mitigasaun, kontrolu Hydro Cloroflouro Carbono (HCFC) no  Hydro Flouro Carbono (HFC).

Sub-programa movilizasaun rekursu no investimentu ba merkadu karbonu ho nia atividade kapitalizasaun fundu klimátika verde, implementasaun merkadu karbonu.

Sub-programa fortalesimentu transversalidade ambientál iha setór sira seluk ho nia atividade emisaun lisensa ambientál.

Sub-programa kontrolu polusaun ho atividade kontrola polusaun (hidrosférica, litosférica e atmosférica), sentru tratamentu óleo reziduál.

Entretantu, programa boa-governasaun no jestaun instituisionál ho nia sub-programa rua (2) no atividade hitu (7).

SEA aprezenta ba 2022 ho estimativa forsa traballu iha funsionáriu 237 (feto 78 no mane 159), no funsionáriu 28 ho kargu dirasaun no xefia.

 Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here