Vice Ministru MNEC, Juliao da Silva. Imajen TATOLI/Egas Cristóvão

DILI, 16 novembru 2021 (TATOLI)—Ministéiru Negósiu Estranjeiru no Kooperasaun (MNEC, siglá portugés) liderada Adaljiza Albertina Xavier Reis Magno, prevee millaun $23-resin iha proposta Orsamentu Jerál Estadu (OJE) 2022, hodi prioritiza ba programa polítika  externa Timor-Leste no boa-governasaun no jestaun instituisional.

“OJE 2022 MNEC prevee millaun $23,” Vise-Ministru Negósiu Estranjeiru no Kooperasaun, Julião da Silva, hateten ba jornalista sira hafoin halo audiénsia públika ho komisaun B Parlamentu Nasionál iha Parlamentu Nasionál, tersa ne’e.

Governante ne’e hateten, ministériu ne’e hetan redusaun orsamentu 19% kompara ho 2021 iha millaun $26-resin.

Tanba ne’e, nia informa, durante audiénsia públika ne’e MNEK aprezenta adisionál millaun $4-resin hodi bele ajuda servisu ministéiru nian ba iha komisaun B Parlamentu Nasionál atu bele tetu no tau ba konsiderasaun.

MNEC relata mós progressu ezekusaun OJE 2021 atinji ona 73% no garante to’o dezembru bele ezekuta to’o 90% tuir programa ne’ebé iha ona.

Tuir livru 2 planu annual OJE 2022 Ministéiru Negósiu Estranjeiru no Kooperasaun (MNEC, siglá portugés) prevee $23,533,166, inklui $88,050 aloka ba Ajénsia Kooperasaun Timor-Leste (ACT-L, siglá portugés), hodi aloka saláriu vensimentu $15,328,179, bens servisu $ 8,204,987, kapitál menór, kapitál dezenvolvimentu no transferénsia públika laiha.

Orsamentu ne’e finansia programa rua, sub-programa neen no atividade ualu.

Programa bazea ba orsamentu

Programa polítika externa Timor-Leste sei gasta $19,212,155 no programa boa-governasaun no jestaun instituisionál sei gasta $4,321,011.

Programa polítika externa Timor-Leste ho objetivu médiu prazu interese nasionál Repúblika Demokrátika Timor-Leste (RDTL) define no promove iha exteriór, hanesan fortalesimentu relasaun diplomátika resíprosidade.

Programa ne’e ho ninia sub-programa defende no promove interese Timor-Leste iha estranjeiru ho nia atividade mak reprezentasaun TL iha nivél bilateral, rejionál no multilaterál, promove no proteje, no negosia asuntu ekonómika, sosiál no kultura ba interese nasionál iha exterior.

Sub-programa kooperasaun internasionál ba dezenvolvimentu ho nia atividade asegura sistema administrativu no operasionál.

Sub-programa fasilitasaun no koordenasaun instituisionál iha ezekusaun polítika externa ho nia atividade jestaun no enkuadramentu rejime karreira diplomátika no tekníku administrativu.

Sub-programa reforsa no fortalese jestaun no reprezentasaun asuntu karáter multilaterál no rejionál ho nia atividade konsertasaun polítika diplomátika, kooperasaun ba dezenvolvimentu no promosaun lingua portugés.

Entretantu, programa boa-governasaun no jestaun instituisionál ho nia sub-programa rua no atividade tolu.

MNEK aprezenta iha 2022 forsa trabalalu ho estimativa funsionáriu hamutuk 319 (feto 122 no mante 197), no funsionáriu 45 ho kargu dirasaun no xefia.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here