Ministru Obra Públika (MOP), Salvador Eugênio dos Reis Soares Pires, akompaña hosi kontratór Chongqing Road Engineering Group Co, Ltd, hareehela estrada nakfera impaktu hosi rai-halai iha Manduki, postu administrativu Atabae, munisípiu Bobonaro, segunda (16/11). Imajen TATOLI/Antónia Gusmão

LIQUIÇÁ, 16 novembru 2021 (TATOLI)–Ministru Obra Públika (MOP), Salvador Eugênio dos Reis Soares Pires no ekipa téknika sira, tersa ne’e, halo inspesaun ba projetu upgrading no manutensaun estrada dirasaun Tibar bá munisípiu Liquiçá, Maubara-Loes no Atabae-Batugade, munisípiu Bobonaro.

Durante inspesaun, ekipa identifika estragu kiik-oan balun iha estrada liga Dili-Tibar no balun iha Liquiçá.

“Ha’u hamutuk ho dirijente Unidade Manajementu Projetu (PMU, sigla inglés) ba projetu empréstimu ne’e, halo inspesaun tanba projetu kuaze konklui ona, liuliu hosi Tasi-tolu to’o Tibar, maski iha estragu oituan tanba kalamidade, tanba ne’e empreza tenke reabilita molok projetu ramata no entrega ba Governu, ha’u hakarak PMU asegura lai reparasaun ba estragu sira inklui haree mós ba kualidade,” Ministru Salvador relata hafoin halo inspesaun iha postu Maubara, munisípiu Liquiçá.

Nune’e mós, kona-ba estrada ligadu Maubara-Loes, Loes-Atabae no Atabae-Batugade, kuaze konklui ona no  progresu atinje ona 94,5%.

Ministru Obra Públika (MOP), Salvador Eugênio dos Reis Soares Pires, akompaña hosi kontratór Chongqing Road Engineering Group Co, Ltd, hareehela estrada nakfera impaktu hosi rai-halai iha Manduki, postu administrativu Atabae, munisípiu Bobonaro, segunda (16/11). Imajen TATOLI/Antónia Gusmão

“Hela de’it oituan, entaun ha’u hakarak mai direta hodi ko’alia ho sira atu ezekuta obra ho di’ak, kona-ba alterasaun ne’ebé bele halo hanesan konstrusaun ba estrada iha Karimbala kuaze metru 100-resin, molok ne’e halo ona gabiaun maibé tanba rai halai, tenke halo fali ajustamentu hodi ko’a fali foho.

Ministru husu Kompañia responsável ba obra atu buka planu mitigasaun ne’ebé kontekstualizadu ho estrutura rai-nia atu asegura katak bainhira projetu ne’e entrega ho kualidade, nune’e bele fasilita atividade ekonómiku tuir vizaun ba investimentu sesaun estrada nian.

“Saida de’it mak sira halo tenke kompleta no durante inspesaun karik identifika estragu ruma, sira tenke hadi’a. Ha’u dehan ona ba sira katak kualidade ne’e importante tanba osan hosi empréstimu liuhosi parseiru desenvolvimentu sira, presiza iha retornu investimentu, tanba ne’e dalan mak tenke kualidade, hafoin fasilita fali ita-nia dezenvolvimentu ekonómiku,” nia dehan.

Orsamentu ba projetu ne’e mai hosi fundu empréstimu hosi Banku Dezenvolvimentu Aziátiku (ADB) ho montante $20.748.566,21, ho naruk estraga kilometru 37,5.

Projetu ne’e hahú konstrusaun iha tinan 2018 no toma-konta hosi kontratór Chongqing Road Engineering (Group) Co,Ltd. no konsultan Dongsung Engineering Co., Ltd.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here