Ema ho Defisiénsia hatudu talentu iha área desportu iha komemorasaun loron mundiál ba Ema ho Defisiénsia ne’ebé hala’o iha Palásiu Prezidente Nicolau Lobato. Imajen/Mídia PR.

DILI, 16 novembru 2021 (TATOLI)–Ministériu Edukasaun, Juventude no Desportu (MEJD), iha tersa ne’e, asina akordu finansiamentu ho organizasaun neen ne’ebé durante ne’e tau-matan ba direitu ema ho defisiénsia iha Timor Leste, hodi  fó apoiu fundu $25.000-resin.

“Orsamentu ne’e sei aloka ba kada organizasaun ho valór $4.000-resin atu aselera programa prioridade ministériu atu reforsa igualdade jéneru no edukasaun inkluziva,” Diretór Jerál Administrasaun no Finansa hosi Ministériu Edukasaun Juventude no Desportu (DJAF-MEJD), António Pires, hateten iha iha salaun enkontru MEJD, Villa verde.

Organizasaun neen ne’ebé hetan apoiu mak hanesan Organizasaun Fuan Nabilan, Asosiasaun Halibur Defisiénsia Timor-Leste (AHDTL), Klibur Defisiénsia Timor-Leste (KDTL), Alma Sister, Madre Bruma no organizasaun AGABE.

“Inisiativa ne’e hodi apoia materiál pedagojia, nune’e bele realiza formasaun ba formadór defisiénsia, espesiál ba formasaun lian jestuál,” nia akresenta.

Notísia relevante: Governu komprometidu garante direitu ema ho defisiénsia liuhosi planu asaun

Iha biban hanesan, tuir Ministru Edukasaun, Juventude no Desportu, Armindo Maia, programa edukasaun inkluziva tama ona iha Orsamentu Jerál Estadu (OJE) 2022, ne’ebé hanesan asuntu transversál ba ministériu hotu.

“Programa edukasaun inkluziva foin dahuluk prevee iha orsamentu tinan 2022 nian. Ida-ne’e atu hatudu katak Governu tau duni importánsia ba asuntu ne’e,” governante ne’e dehan.

Ministru konsidera, apoiu ne’ebé MEJD fó ba ema ho defisiénsia ne’e la’ós karidade, maibé hanesan direitu ne’ebé konsagra iha Konstituisaun, katak edukasaun nu’udar direitu universál no inkluzaun, ne’ebé sei la husik ema ida iha kotuk.

“Ha’u apresia tebes liafuan murak ne’ebé maluk sira hato’o ona, nu’udar mensajen ba ami atu kontinua serbisu maka’as no fó orientasaun ida ba ita hotu atu promove liután direitu ba ema ho defisiénsia,” nia akresenta.

Governante ne’e dehan, edukasaun inkluzaun ne’e transversál ba ministériu hotu.

“Ezemplu kuandu iha konstrusaun ruma, instituisaun Estadu ne’ebé toma konta ba konstrusaun ne’e tenke hanoin asesu ba ema ho defisiénsia sira. Tanba ne’e, polítika ne’ebé MEJD halo daudaun maka konstrusaun eskola no sala aula sira atu ema ho defisiénsia sira bele asesu.

Nune’e mós, Diretór Ezekutivu ADMTL, Gaspar Afonso, konsidera apoiu ne’ebé MEJD fó ba organizasaun neen tanba haree ba problema ne’ebé ema ho defisiénsia sira hasoru durante ne’e, ne’ebé la haree ba valór osan maibé importante liu maka oinsá bele tulun maluk defisiénsia sira bele asesu ba edukasaun.

Tuir Gaspar Afonso, ema ho defisiénsia la’ós ema ne’ebé laiha forsa atu partisipa iha dezenvolvimentu nasionál, tanba ne’e husu ba Governu atu hadi’a kondisaun atu bele asesu ba  edukasaun inkluziva.

“Ami simu ona osan hosi ita-boot sira, agora oinsá ho ita-nia preparasaun. Ami-nia obrigasaun maka ezekuta osan sira ne’e hodi halo formasaun naun formál ba ami-nia maluk defisiénsia sira, maibé Governu nia knaar mak atu haree sustentabilidade programa sira, tanba ami-nia maluk sira mós presiza siénsia, tanba ne’e presiza buka dalan,” nia dehan.

Daudaun ne’e, ema ho defisiénsia iha Timor-Leste hamutuk 38.118, ne’ebé hatudu katak hosi númeru ne’e, ema na’in-25.789 iha hela alfabetizasaun no 12.329 seluk asesu ona edukasaun inkluziva.

“Durante ne’e ami luta maka’as atu polítika inkluzaun bele sai realidade no labele husik ema ida iha kotuk, inklui fó oportunidade ba ema ho defisiénsia bele partisipa iha dezenvolvimentu nasionál bazeia ba Konstituisaun artigu 59 hodi fó dalan ba ema hotu atu asesu ba edukasaun no kultura,” nia tenik.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here