Embaixada Korea mai Timor-Leste Kim Jeong-ho, akompaña ho PA RAEOA, presta omanajen ba iha monumentu soudozu Korea na'in-lima. Imajen/mídia ZEEMS.

OÉ-CUSSE, 16 novembru 2021 (TATOLI) – Embaixadór Korea mai Timor-Leste, Kim Jeong-ho, segunda ne’e presta omenajen ba  monumentu saudozu forsa koreanu na’in-lima ne’ebé mate iha 2003 liubá.

Forsa koreanu na’in-lima ne’e hala’o misaun iha Timor-Leste liuhosi Peace Keeping Force (PKF) no momentu ne’e lakon sira-nia vida iha mota Noel-Ekat, suku Bobometo, sub-rejiaun Oésilo, iha loron 03 marsu 2003 tanba kauza hosi dezastre naturál.

Iha momentu forsa koreanu na’in-lima ne’e atu ultrapasa mota refere, maibé la konsege nune’e hetan asidente hodi rezulta forsa na’in-lima komposta hosi Tenente-Koronél na’in-rua no Sarjentu na’in-tolu lakon vida.

Tenente-Koronél na’in-rua ne’e mak hanesan Byungjo Min no Jin Kyu Park, Sarjentu Jong Hoon Baek, Jeong Joong Kim no Hee Choi.

“Ha’u-nia vizita prinsipál iha Oé-Cusse, mai sunu-lilin, hodi fó omenajen ba monumentu soldadu sira mate iha Oé-Cusse, tanba ha’u asume kargu ne’e foin tinan ida, loloos mai iha inisíu maibé tanba situasaun COVID-19, entaun horisehik foin mai hanesan presta omenajen ba soldadu sira nia monumentu, tanba lakon sira-nia vida iha Oé-Cusse ho dezastre naturál iha 2003,” Embaxadór Kim Jeong-ho, informa ba Agência TATOLI iha aeroportu Rota do Sândalo, Oé-Cusse, tersa ne’e.

Diplomata ne’e agradese ba autoridade tanba ajenda ona atu realiza selebrasaun tinan 20 hodi komemora loron akontesimentu forsa koreanu na’in-lima nia mate.

“Ha’u agradese tanba Oé-Cusse iha fatin espsiál ba ema Korea sira, tanba iha relasaun emosionál komunidade Korea ho Oé-Cusse, tanba ne’e maka ami disponível no komitmentu atu koopera hamutuk ho autoridade RAEOA ba asuntu kooperasaun saida de’it,” nia katak.

Nune’e mós agradese tanba Autoridade RAEOA hamosu inisíativa sei hadi’a monumentu ne’e iha tinan oin, no tuir kompromisiu mós katak autoridade sei halo infraestrutura memoriál ba monumentu tanba tinan oin atu halo komemorasaun ba tinan 20 hosi dezastre ne’e.

Prezidente Aurtoridade RAEOA, Arsénio Paixão Bano, hateten, autoridade iha obrigasaun atu konerva fatin memoriál ne’e, tanba objetivu forsa Korea sira mai iha Oé-Cusse atu fó seguransa ba povu to’o hetan dezastre, entaun autoridade presiza konsidera asuntu ne’e.

“Tanba mai fó seguransa ba ita-nia nasaun mak hetan dezastre iha Oé-Cusse, entaun autoridade ita sei konstrui fatin sira-ne’e halo didi’ak tanba tinan oin ita sei halo komemorasaun kompleta ba tinan 20 ba akontesimentu ne’e,” nia katak.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here