Jogadór Alarico Mota (11) hosi Amor Oébau FC. Imajen Tatoli/Abílio Elo Nini.

OÉ-CUSSE, 16 novembru 2021 (TATOLI) —  Ekipa Amoru Oébau FC halakon Inur Sakato FC iha Kopa Asosiasaun Futeból Oé-Cusse (AFO) ho rezultadu 4-1.

Jogadór sub-22 ho naran Alarico Mota ho kamizola 11, susesu lori Amoru Oébau FC ho golu (3) no jogadór Eugénio de Araújo marka golu ida (1), hodi manán Inur Sakato FC 4-1 iha 16 finál Kopa Asosiasaun Futeból Oé-Cusse (AFO).

Jogadór Alarico Mota ho kamizola (11) lansa golu dahuluk iha primeira parte iha minutu ida, no lansa golu daruak hosi jogadór Eugébio de Araújo ho kamizola 10 iha minutu 24. 

Purtantu iha menutu 39, Inur Sakato FC liuhosi jogadór Fernando Maukita lansa golu ida, nune’e iha primeira parte ekipa rua ne’e hatuur rezultadu 2-1.

Tama ba segunda parte, to’o minutu 48 jogadór Alarico Mota (11) lansa-tán golu ida hodi muda rezultadu ba 3-1, no menutu 77 jogadór Alarico Mota lansa-tán golu ida, to’o termina jogu iha minutu 90 rezultadu 4-1, nune’e ekipa Amor Oébau konsege hakat ba oitavu finál kontra ekipa Sibuki FC iha jogu tuir mai.

Ho rezultadu ne’e treinadór Inur Sakato FC, João Baptista rekoñese ekipa jogadór Inur Sakato FC falta tékniku hodi domina kampu, nune’e afeita derrota 4-1.

“Jogu ne’e lakon ka manán normál, ami rekoñese jogadór falta tékniku no ladún domina kampu, maibé ami lamenta tanba desizaun hosi árbitru sira dalaruma la tuir regulamentu jogu nian, maibé prontu rezultadu ami ohin ita sai sasin ami lakon, tanba ida-ne’e fallansu hosi ami-nia jogadór sira falta tékniku no ladún domina kampu,” treinadór João Baptista.

Treinadór Amor Oébau, Octaviano Cofitalan, agradese ba ekipa jogadór Amor Oébau FC, tanba hatudu jogu ho kualidade no serbisu hamutuk iha kampu hodi hetan rezultadu 4-1.

Nune’e tuir kalendáriu ekipa Amor Oébau FC sei hasoru ekipa Sibuki FC iha jogu iha semana oin. Entretantu, jogu ho durasaun menutu 90 ne’e dirije hosi árbitru Octaviano da Cruz, asistente dahuluk Candida da Costa Tefa no asistente daruak Fransisco Cofi.

Notísia relevante: Abertura Copa AFO RAEOA sub-22 sei hala’o aban

Jornalista         :Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here