Asesór Administradór Munisípiu Covalima entrega osan ba grupu sira-ne’ebè hetan apoiu orsamentu hosi transferénsia públiku hosi SEJD ba grupu juventude 26. Imajen Tatoli/Celestina Teles.

COVALIMA, 16 novembru 2021 (TATOLI)—Jenerál Manajer Centro Juventude Covalima (CJC), Calistro Leite Gusmão, husu grupu juventude 26 ne’ebè hetan apoiu orsamentu hosi Sekretáriu Estadu Juventude no Desportu liuhosi programa estimulu empreendedorizmu sosiál juventude suku tenke hatudu nia rezultadu.

“CJC husu ba grupu 26 hosi postu administrativu hitu (7) iha Covalima ne’ebè hetan apoiu orsamentu hosi ita-nia Sekretáriu Estadu Juventude no Desportu tenke hatudu nia rezultadu,” Calistro Leite Gusmão hateten ba jornalista sira hafoin entrega orsamentu ba reprezentante grupu 26, iha salaun CJC, Covalima, tersa ne’e. 

Totál orsamentu ne’ebè mak entrega ba grupu 26 ne’ebè mai hosi postu administrativu hitu ne’e  hamutuk $19,250.00 maihosi orsamentu Transferénsia públiku hosi SEJD ne’e, husu ba benefisiáriu sira tenke hatudu rezultadu.

“Apoiu orsamentu ba ita-boot sira, osan na’in sei mai haree ita-boot sira-nia grupu ne’ebè mak hetan apoiu ne’e, tanba ne’e ita-boot sira tenke hatudu rezultadu pozitivu ba ema osan na’in sira,” nia dehan. 

Adjuntu Sekretáriu Administradór Munisípiuu Covalima, Francisco Alves, informa CJC entrega ona osan ba grupu 26, tanba ne’e grupu sira la’ós buka oportunidade atu hetan osan maibé ho simu no ezekuta ho responsabilidade. 

“Ita-boot sira uza osan ho responsabilidade, nune’e ba oin kontinua tau konfiansa ba ita-boot sira nia grupuu hodi kontinua haboot ita-boot sira-nia grupuu, nune’e uza osan balun hodi bele sustenta família uma laran,” nia dehan.

Reprezentante hosi Grupu Haburas Unidade, Erna Wati, apresia ba Governu implemeta programa estimulu empreendedorizmu sosiál juventude suku liuhosi Centro Juventude Covalima hodi fó apoiu ba joven sira liuhosi grupu no hodi bele hamoris grupu.

 “Ami kontente Governu fó apoiu apoiu ami nia grupu ortikultura hodi kuda modo.  Ami-nia rezultadu kuda modo ami foin koileta no ami bele faan iha merkadu hodi bele hetan osan uitoan, nune’e osan ne’ebè apoiu mai ami ne’e labele mate ka lakon,” Erna Wati hateten. 

Enkuantu, grupu 26 iha munisípiu Covalima ne’e foka liu ba área sira hanesan meiu ambiente, turizmu no agrikultura. 

CJC fó apoiu orsamento ba grupuu sira tanba hetan apoiu orsamentu hosi Sekretáriu Estadu Juventude no Desportu ba programa estimulu empreendedorizmu sosiál juventude suku hamutuk $45,000.00, no hosi orsamentu ne’e hamutuk $19,250 hodi fó apoiu ba grupu 26 tanba orsamentu hela de’it $20.000-resin. 

Notísia Relevante: Centro Juventude Covalima apoia orsamentu $19,250 ba grupu 26

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here