Diretora PNDS Baucau, Amélia Maria Viegas. Imajen Tatoli/Natalino Belo.

BAUCAU, 15 setembru 2021 (TATOLI) – Implementasaun Uma Kbiit Laek (UKL) liuhosi Programa Nasionál Dezenvolvementu Suku (PNDS) iha munisípiu Baucau bazea ba Ekipa Verifikasaun Vulnerável (EVV).

“Konsellu suku nafatin firme sira-nia dezisaun katak bazea ba rezultadu verifikasaun iha terrenu, karik balun kestiona dehan iha familiarista, kestaun ne’e ami entrega ba suku nia kompeténsia no benefisiáriu ne’e kontinua hetan UKL tanba bazea ba EVV katak ema ne’e merese atu hetan,” Diretóra PNDS Baucau, Amélia Maria Viegas, ko’alia iha Vila Nova, segunda ne’e.

Diretór PNDS Munisípiu Baucau ko’alia kestaun ne’e hodi fó resposta ba lamentasaun balun katak, implementasaun programa Uma Kbiit Lae, iha suku Afasa, postu administrativu Quelicai deskonfia familiarizmu.

Nia esplika, matadalan ne’ebé iha PNDS, UKL iha suku Afaça implementa iha aldeia Uekubuti verifika hosi ekipa verifikadór kompostu husi tekniku PNDS postu, tékniku suku, xefe aldeia, reprezentante veteranu, OPS no xefe suku.

Sidadaun kbiit laek ne’ebé merese atu hetan UKL tenke tuir kritéria husi matandalan UKL nian, haree aspetu haat hanesan kondisaun sosiál, ekonómiku, uma no kondisaun rai.

“Foin iha kazu ida, ne’e iha ita-nia suku Afaça, ne’ebé foin daudaun (deputadu) levanta iha Parlamentu Nasionál (PN), ita hotu hatene kestaun ida-ne’e, xefe suku rasik halo ona justifikasaun klaru ba públiku to’o agora ida ne’e laiha kestaun ona,” Amélia akresenta.

Xefe Suku Afaça, Joaquim Fernandes Ximenes, hateten, polémika ne’e mosu bainhira deputadu Parlamentu Nasional (PN) hafoin halo konsolidasaun iha suku Afaça ne’ebé rona hosi komunidade balun nune’e levanta iha plenária.

“Sira mai halo diálogu mak populasaun sira ko’alia Uma Kbiit Laek fó fali ba funsionáriu públiku, fó fali ba F-FDTL, ne’e mak ha’u rona,” xefe suku hateten liuhosi telefónika.

Nia akresenta, totál benefísiariu ba UKL iha suku Afaça hamutuk ema na’in-27 no tinan ne’e iha benefisiáriu na’in-tolu iha aldeia Uekubuti.

“Ne’e mak ami verifika tiha nia dokumentu, pontu barak liu mak ami fó valór ba ema na’in-tolu ne’e,” Joaquim argumenta.

Entretantu, totál orsamentu ne’ebé aloka ba suku Afaça iha programa UKL tinan ne’e hamutuk $54.000 ne’ebé aloka ba kategoria hanesan kustu operasionál $3.000, fee Banku Nasionál Komérsiu Timor-Leste (BNCTL, sigla portugés) $108 no orsamentu fíziku hamutuk $51.000 ba benefísiariu hamutuk na’in-tolu.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here