Aldeia Lenuk-hun no Ai-lele hun nu’udar aldeia rua entre aldeia haat seluk, lokaliza iha Suku Camea, Postu Administrativu Cristo Rei, Munisípiu Dili. Haree ba poténsia, aldeia rua ne’e mós iha nia poténsia turístiku naturál no kulturál.

Tanba ne’e, Ajénsia Estadu Unidu ba Dezenvolvimentu Internasionál (USAID, sigla inglés) liuhusi Programa Turizmu ba Ema Hotu organiza atividade Familiarization Trip ka Fam Trip hodi esplora poténsia turistíku naturál no kulturál, husi foho leten Kakusan besik área Cristo rei nian durante oras lima nia laran.

USAID nia projetu Turizmu ba Ema Hotu ne’e, ajuda Timor-Leste ne’ebé dependente ba mina hodi diversifika ninia ekonomia liuhusi promove turizmu ekolójiku ne’ebé favoravel ba ambiente bazea ba rikeza patrimóniu nasaun nian.

Nune’e, iha kinta, loron 11 novembru 2021, molok loromatan nia roman mihis nakfera iha Foho Fatuahi nia leten aas bá leno Sidade Dili, bainhira maho-been dadeer sei haku’ak-metin ai-tahan sira iha dadersan malirin katak iha tuku 06h15 ekipa Fam Trip, halibur hamutuk ona iha Timor Plaza, hodi rona esplikasaun-badak husi ekipa organizadora kona-ba lala’ok viajen no informasaun adisionál seluktan.

Depois rona esplikasaun, tuirmai, entre tuku 6h15 no 11h15, ekipa influensiadora turista sira sa’e transporte públiku (mikrolete) ne’ebé aluga husi projetu ne’e no hahú viajen husi Timor Plaza ba iha Rai-hun, suku Camea, ho route, Timor Plaza, Farol no Camea, hasoru-malu dahuluk ho ekipa organizadora ne’ebé sai matadalan ba grupu ne’ebé atu la’o-ain sa’e ba foho-leten Kakusan.

USAID organiza Fam Trip ne’e, ho objetivu atu lori influensiadór/a turístiku sira kompostu husi media, estudante, gia turístika ajénsia viajen no operadór turístiku sira atu explora dahuluk poténsia turístika sira iha área refere nune’e bele hetan esperiénsia no atrai liután vizitante sira atu ba vizita.

Liuhusi Fam Trip ne’e, influensiadór turístiku sira la’o-ain husi Becora, Rai-hun no sa’e ba iha foho Kakusan atravesa uma-lisan 14 ne’ebé nia huun no abut metin nanis kedas, iha périodu kolonializasaun portugeza no mós metin no buras ona husi otas ba otas no husi jerasaun ba jerasaun, to’o ohin loron, hanesan Bilese Sofun, Bilese Soublaun, Bilese Bikaloes, Dilibaku, Lolhae, Padkelu, Lakeu, Mauabu, Manulae, Manetelu, Manheu, Maneusu, Padnaro, no Malmeta iha Aldeia Lenuk-hun molok to’o iha Foho Kakusan iha Aldeia Ai-lele hun, Suku Camea, Postu administrativu Cristo rei, Munisípiu Dili, ne’ebé mak identifikadu riku ho poténsia kulturál no naturál.

To’o iha fatin destinu, grupu influensiadór/a turístiku sira simu direta husi komunidade lokál ho dansa kulturál hanesan tebe-dai no baku tambor hanesan jestu respeita ida no simu bainaka tuir tradisaun, hafoin tuirmai halibur hikas enerjia no kbiit foun ho deskansa no tuur iha biti tradisionál ne’ebé homan husi liman-badaen, ne’ebé nahe ona no kontinua ho lia-na’in sira fahe istória kona-ba lala’ok ezisténsia uma-lisan sira ne’e iha Aldeia Lenuk-hun.

Produsaun Tatoli I.P ©2021

PUBLISIDADEiklan

HAKEREK NO HATÁN

Please enter your comment!
Please enter your name here