Embaixadór Korea mai Timor-Leste, Kim Jeong-ho, foto hamutuk ho Prezidente Autoridade RAEOA, Arsénio Paixão Bano, hafoin remata enkontru iha edifísiu ZEESM. Imajen/mídia ZEEMS.

OÉ-CUSSE, 16 novembru 2021 (TATOLI) — Governu Repúblika Korea liuhosi Embaixadór Kim Jeong-ho, hamutuk ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, diskute futuru kooperasaun iha área kapasitasaun rekursu umanu, setór edukasaun no agrikultura.

Autoridade RAEOA enkontru kontéjia ho embaixadór Korea, ko’alia kona-ba polítika kapasitasaun formasaun rekursu umanu no apoia ba sentru juventude.

“Liuliu apoiu ba setór agrikultura, edukasaun no bee-moos inklui apoiu informasaun komunikasaun teknolojia nian no embaixadór aseita, entaun ita sei servisu hamutuk iha futuru,” Arsénio Paixão Bano, informa ba Agência Tatoli, iha edifísiu ZEESM, tersa ne’e.

Autoridade ne’e fó sai katak, embaixadór Korea promete destaka funsionáriu Korean International Cooperation Agency (KOICA) nian nune’e apoia ba servisu edukasaun ba asuntu bolsa estudu no kapasitasaun ba juventude sira iha rejiaun refere.

Embaixadór Korea, Kim Jeong-ho, konsidera ona hirak-ne’ebé autoridade propoin, tanba autoridade presiza tulun iha área kapasitasaun ba setór sira hotu.

Tanba tuir nia, programa ida importante maka asuntu kapasitasaun no formasaun ba rekursu umanu iha RAEOA.

“Ami diskute ho Prezidente Autoridade RAEOA iha interese maka’as ba asuntu ne’e iha Oé-Cusse, atu desenvolve asuntu kapasitasaun nian, no diskute mós asuntu bee-moos, no seluk tán, entaun iha futuru iha posibilidade ita bele realiza ona kooperasaun ne’e”, Kim Jeong-ho informa.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here