BELUN fasilita formasaun bazea ba jeneru no prevensaun violénsia ba juventude sira iha Maliana, munisípiu Bobonaro,(16/11). Imagen Tatoli/Sérgio da Cruz.

BOBONARO, 16 novembru 2021 (TATOLI) — Organizasaun Naun Governamental BELUN, fasilita formasaun kona-ba igualdade bazea ba jéneru ba joven no komunidade sira iha postu administrativu Maliana, munisípiu Bobonaro.

Jestór programa kapasitasaun norma sosiál Spoth Light, Miguel Mau Soares, informa atividade ne’e realiza tanba bazea ba peskiza norma sosiál kona-ba impaktu monográfika juventude sira-ne’ebé BELUN halo iha fulan rua ba kotuk, identifika katak joven barak laiha informasaun no kapasidade koana-ba violénsia bazea ba jéneru.

Atividade ne’e rasik hanesan inisiativa hosi programa Spoth Light realiza no apoia fundu mai hosi Uniaun Europeia.

“Kapasitasaun ne’e nia objetivu mak atu  haforsa kapasidade komunidade no joven sira iha abilidade ba prevensaun violénsia bazea ba jéneru iha Timor-leste,” nia informa ba jornalista sira, iha salaun postu administrativu Maliana, tersa ne’e.

Atividade ne’e realiza durante loron tolu, foka liu kona-ba violénsia bazea ba jéneru, lideransa no abilidade komunikasaun no transportasaun konflitu.

Tuir nia, iha modul tolu ne’e sei lori joventude no komunidade sira oinsá atu entende kona-ba jéneru, sai lideransa ne’ebé bele halo komunikasaun di’ak entre ema ida ba ema seluk nune’e bele prevene konflitu no violénsia bazea ba jéneru iha sosiedade nia leet.

“Ami sei tuur hamutuk ho sira atu halo planu asaun ida ba individuál, ba família no ida ba organizasaun atu influénsia ba ema hotu bele luta halakon miss informasaun kona-ba violénsia bazea ba jéneru iha ita nia rai,” nia fundamenta.

Iha fatin hanesan, partisipante Merita Bragança, konsidera programa ne’e importante tebes tanba bele aumenta ona sira-nia konñsimentu ba prevensaun violénsia ne’ebé durante sempre hasoru iha sira-nia família no sosiedade.

“Ba oin matéria sira-ne’ebé hau hetan hosi formadór sira sei fahe tutan ba ha’u-nia família uma-laran no viziñu sira atu labele akontese tán violénsia, liuliu mai ami feto no labarik feto sira,” nia katak.

Partisipante sira-ne’ebé partisipa iha atividade ne’e besik na’in-20 mai hosi suku neen iha postu administrativu Maliana. Tuir planu atividade ne’e sei realiza mós iha postu administrativu Balibo no Atabae.

Jornalista         : Sérgio da Cruz

Editór               :Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here