Autoridade postu Uatulari, Manuel do Rosário. Imajen TATOLI/Vitorino Lopes da Costa

VIQUEQUE, 16 novenbru 2021 (TATOLI)—Autoridade postu Uatulari, Manuel do Rosário, informa, programa mão de obra ne’ebé implementa iha faze dahuluk ramata ona, tanba ne’e daudaun halo hela preparasaun atu implementa ba faze daruak.

“Programa ne’e susesu tanba faze dahuluk hahú halo pagamentu, agora hein faze mai tan,” Autoridade postu ne’e dehan ba Agência TATOLI, via telefónika, tersa ne’e.

Manuel do Rosário konsidera programa ne’e susesu tanba xefe suku Matahoi, Macadique, Uaitame, Afaloika, Babulu no Vesoru organiza no envolve populasaun ho di’ak.

“Ha’u-nia xefe suku na’in-neen matenek, sira organiza povu hodi partisipa serbisu la haree ba kór, sira matenek hili ema no halo rotativa, iha ida ka rua mak sai permanente hodi kontrola serbisu,” nia akresenta.

Notísia relevante: Programa Mão de Obra iha postu Viqueque Villa atinje 65%

Sistema implementasaun projetu mão de obra kada suku halo rotativa atu populasaun hotu hetan oportunidade ba $1 ka $2 kada loron hodi rekupera ekonomia ne’ebé monu kauza hosi pandemia.

“Kada suku kria grupu no kada grupu iha ema na’in-20, ne’ebé na’in-ida mak atu kontrola. Hosi programa ne’e, ha’u fiar povu barak sei partisipa tanba ha’u la simu krítika ruma hosi povu durante implementasaun programa to’o ramata faze dahuluk nia,” nia tenik.

Governu liuhosi Ministériu Administrasaun Estatál (MAE) iha tinan 2021 aloka orsamentu $50.000 ba kada postu hodi realiza programa mão de obra.

“Orsamentu ne’e ami implementa uluk $25.000 iha faze dahuluk ne’ebé susesu ona. Ha’u haree povu Uatulari antusiazmu tebes envolve programa ne’e hodi hala’o serbisu,” Autoridade postu ne’e dehan.

Pagamentu halo ona iha suku tolu iha postu Uatulari no falta suku tolu, ne’ebé bainhira pagamentu finaliza hotu mak kontinua implemeta ba faze daruak.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here