Xefe suku Ahic, Hercilio Soares. Imajen TATOLI/Vitorino Lopes da Costa

VIQUEQUE, 15 novembru 2021 (TATOLI)—Xefe suku Ahic, postu adiministrativu Lacluta, munisípiu Viqueque, Hercilio Soares, hateten, mudansa klimátika tinan ne’e halo abitante lokál nia to’os barak mak hetan estragu.

“Iha ha’u-nia suku, udan foin lalais loron tolu liubá estraga hotu komunidade nia to’os. Tanba ne’e, komunidade preokupa tanba enfrenta mós falta ai-han,” Líder komunitáriu dehan ba Agência TATOLI, iha salaun Administrasaun Viqueque, segunda ne’e.

Tanba ne’e, Xefe suku husu ba Governu atu normaliza mota sira, nune’e bainhira udan labele implika ba atividade komunidade lokál.

“Tuir loloos udan para ona iha fulan-agostu, maibé fulan-setembru to’o agora udan hela de’it. Ida-ne’e halo ita dúvida no povu agrikultór halo to’os mós ladi’ak. Iha ha’u-nia suku, maioria abitante hanesan to’os-na’in,” nia akresenta.

Notísia relevante: WFP konvida komunidade timor-oan harii reziliénsia ai-han ba mudansa klimátika

Nia mós husu Governu liuhosi Ministériu Solidaridade Sosiál no Inkluzaun (MSSI) atu fó ajudu umanitáriu ba povu Ahic

“Karik bele fó nesesidade bazika ba populasaun hanesan foos, nune’e tinan ne’e bele aguenta, se lae ami susar tanba komunidade moris iha área remota,” Hercilio Soares dehan.

Tuir dadus, suku Ahic kompostu hosi aldeia lima hanesan Crarec Boco ho totál uma-kain 42, Hali-oan ho totál uma-kain 36, Ailooc iha uma-kain 57, Hali-mean iha 97, Cai-ua iha 72, nune’e totál uma-kain iha suku hamutuk 304 no totál populasaun 2.004.

Iha sorin seluk, Diretór Sentru MSSI Viqueque, Geraldo de Carvalho, hateten, apoiu foos ba komunidade bazeia ba pedidu hosi autoridade suku.

“Regra maka xefe suku tenke hato’o pedidu mai MSSI Viqueque maka sira mai simu foos hodi distribui ba komunidade. Tanba ne’e, ha’u bá Xefe suku Ahic hodi lori pedidu mai hatama iha MSSI hodi hetan apoiu,” nia dehan.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here