Diretór Edukasaun RAEOA, Daniel Mauno. Imajen Tatoli/Abílio Elo Nini.

OÉ-CUSSE, 15 novembru 2021 (TATOLI)— Edukasaun Rejiaun Administrativa Espesiál Oé-Cusse Ambeno (RAEOA) submete ona númeru estudante ba Ministériu Edukasaun, Juventude no Desportu (MEJD) molok realiza ezame nasionál.

Diretór Edukasaun Rejiaun Administrativa Espesiál Oé-Cusse Ambeno (RAEOA), Daniel Mauno, fó sai katak, estudante nível sekundáriu jerál no tékniku vokasionál hamutuk 3,913 mak nu’udar kandidatu atu partisipa iha ezame nasionál tinan 2021 nian.

“Lista ba kandidatu estudante 3.913 ne’e, edukasaun submete ona iha ministériu hodi prepara númeru ba ezame nasionál,” Diretór Edukasaun RAEOA, Daniel Mauno, informa ba Agência Tatoli iha Santa Rosa, Oé-Cusse, segunda ne’e.

Ensinu sekundáriu fahe ba rua, ensinu sekundáriu jerál iha eskola neen (6) ho totál kandidatu ezame nasionál hamutuk 2.595 no tékniku vokasionál rua (2), ho totál kandidatu hamutuk 1.318. Nune’e totál kandidatu partisipa iha ezame nasionál tinan ne’e iha Oé-Cusse hamutuk estudante 3.913.

Enkuantu kandidatu ba ezame nasionál ba ensinu báziku iha terseiru siklu atu pasa ba eskola sekundária totál hamutuk alunu 20.553, hosi Ensinu Bázika Sentrál (EBC,sigla portugés) 13.

Tuir kalendáriu ezame nasionál tinan ida ne’e sei realiza iha loron 13 to’o 15 dezembru ba disiplina nasionál, no loron 16 to’o 18 dezembru ne’e ezame lokál.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here