Segundu Komandante PNTL Munisípiu Bobonaro, Asistente Superientendente Fasio de jesus Lima, abertura ekipa ne’ebé atu hasa’e Bandeira Nasionál iha 28 Novembru. Imajen Tatoli/Sérgio da Cruz.

BOBONARO, 15 novembru 2021 (TATOLI) — Polísia Nasionál Timor-Leste (PNTL) Komandu Munisípiu Bobonaro, hahú treina formatura ba esdudante sira hodi halo preparasaun atu hasa’e Bandeira Nasionál iha loron Proklamasaun Independénsia 28 Novembru ba dala-46.

Atividade treina ba membru korpu hasa’e Bandeira RDTL ne’e abertura hosi Segundu Komandante PNTL Munisípiu Bobonaro, Asistente Superintendente Fasio de Jesus Lima, iha kampu futeból, postu administrativu Maliana, munisípiu Bobonaro, segunda ne’e.

Membru korpu hasa’e Bandeira RDTL hamutuk na’in-114 mai hosi estudante Sekundáriu Jerál Dom Martinho da Costa Lopes, CAFE Maliana no Eskola Téknika Informátika (ETI) Maliana.

“Ita hahú abertura no hahú treina estudante sira oinsá atu kapasita sira ba iha preparasaun komemorasaun 28 Novembru iha munisípiu ida-ne’e bele la’o ho susesu,” Segundu Komandante PNTL Munisípiu Bobonaro, Asistente Superintendente Fasio de Jesus Lima informa ba jornalista sira iha Maliana.

Instutór na’in-lima kompostu hosi membru PNTL na’in tolu no BOP Kompañia Delta Bobonaro na’in-rua mak orienta estudante sira kona-ba orden intermu preparasaun fízika no prátika ba orden unida nian ho formatura modelu 28, 11, 75 hodi demonstra formatura iha loron istóriku 28 Novembru 1975 nian.

“Formatura ne’e iha pelotaun ida kompostu hosi na’in 28, depois na’in 11 reprezenta fulan ninian no na’in 75 reprezenta ba tinan ninian. Hosi sira-ne’e idak-idak sei la tuir ninia formatura, maibé ida 11 ne’e mak sei komanda,” nia fundamenta.

Segundu Komandante Munisípiu Bobonaro husu ba estudante sira atu nafatin aprende ho sériu no kumpre regra hosi instrutór sira, nune’e bele demonstra ba públiku ho rezultadu ne’ebé di’ak.

Estudante Maria de Jesus, sente kontente tanba bele hetan oportunidade partisipa iha formasaun ne’e tanba liuhosi ida-ne’e bele aumenta tán koñesimentu.

“Ida-ne’e hanesan oportunidade ida mai ami atu aprende, maibé mós responsabilidade boot ida, tanba hasa’e bandeira la’ós buat fásil ida, presiza treinu ho sériu, labele halo sala iha serimónia ofisiál,” nia katak.

Maske formasaun ne’e foun ba Maria de Jesus, maibé nu’udar jerasaun  foun ne’ebé iha espíritu nasionalizmu no patritizmu iha devér no obrigasaun atu ezerse nia kontribuisaun tomak ba Timor-Leste liuhosi atividade hasa’e bandeira.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here