Diretór Programa Nasionál Dezenvolvimentu Suku (PNDS) iha Covalima, Filipe Cardoso. Imajen Tatoli/Celestina Teles.

COVALIMA, 15 novembru 2021 (TATOLI)—Diretór Programa Nasionál Dezenvolvimentu Suku (PNDS) iha Covalima, Filipe Cardoso, informa Programa Nasionàl Dezenvolvimentu Suku reabilita ona sede suku 18 iha munisípio Covalima. 

“Iha Covalima, ita reabilita sede Suku 10 ne’e implementa iha postu administrativu Zumalai no reabilita sede suku ualu (8) iha postu administrativu Fatululik hodi reabilita sede suku rua (2),” Filipe Cardoso hateten ba Agência Tatoli iha nia knaar fatin, segunda ne’e.

Progresu implementasaun reabilita sede suku ba faze dahuluk ne’e suku sia (9) finaliza ona, falta sede suku ida (1) ne’ebé seidauk finaliza mak sede suku Usecai ho ninia progresu foin mak atinje 56%, tanba kondisaun estrada la favorese atu transporta materiál konstrusaun. 

Ba faze daruak, nia dehan, PNDS reabilita ona sede suku ualu (8) iha postu administrativu Suai Vila ne’ebé reabilita sede suku lima (5) no iha postu administrativu Fatumea reabilita sede suku tolu (3). 

Progresu implementasaun ba faze daruak foin mak tama iha etapa mobilizasaun traballadór no sei iha prosesu aprovizionamentu. 

Nune’e, ekipa PNDS hamutuk ho ekipa jestaun suku la’ós konsentra ba asuntu reailitasaun ba sede suku maibé iha mós programa sira seluk hanesan implemeta konstrusaun “Uma Kbiit Laek” no PNDS Regulár.

Nia dehan, orsamentu ba reabilitasaun sede suku ba faze dahuluk hamutuk kuaze $139,241.93 no ba faze daruak ho orsamentu hamutuk $97,860. 

Ba Programa Nasionál Dezenvolvimentu Suku (PNDS), Administrasaun Munisipal Covalima, iha Orsamentu Jeral Estadu 2021 hetan alokasaun orsamentu hamutuk tokon $2.3 hodi implementa programa PNDS.

Munisípiu Covalima hetan alokasaun orsamentu hosi Programa PNDS-Regulár hamutuk rihun $575,000. Hosi totál ne’e atu finansia ba atividades fiziku hamutuk rihun $506,750 ba suku 12 no restu rihun $68,250 ba kustu operasionál.

Munisípiu Covalima hetan alokasaun orsamentu hosi Programa PNDS-UKL hamutuk tokon $1.6. Hosi totál ne’e atu finansia ba atividades fiziku hamutuk tokon $1.5 ba suku 30 (aldeia 90), operasionál rihun $90,000 no fee ba BNCTL rihun $3,240.

Munisípiu Covalima hetan alokasaun orsamentu hosi Programa PNDS-Reabilitasaun hamutuk rihun $110,093. Hosi totál ne’e atu finansia ba atividades fiziku hamutuk $97,860 ba suku ualu (8) no restu rihun $12,233 ba kustu operasionál.

Pozisaun jeográfika Administrasaun Munisipál Covalima iha área luan 1,226 km², ho populasaun ema na’in 59,455 tuir sensu 2015.

Munisípiu Covalima iha Postu Administrativu hitu (7), suku 30 no aldeia 148. Postu Administrativu Zumalai iha suku barak liu kompara ho sukus seluk iha Administrasaun Munisipál Covalima.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here