Membru PNTL na’in-34 ne’ebé tuir kursu promosaun diviza iha Sentru Formasaun Polísia. Imajen/Natalino Costa

DILI, 15 novembru 2021(TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, hateten, membru PNTL nain-34 hahú tuir kursu promosaun diviza ba Inspetór Asistente, durante semana-10 iha Sentru Formasaun Polísia,Comoro.

“Ha’u husu ba ita bo’ot sira tenke aproveita didiak oportunidade, tanba formasaun importante atu sukat ita nian kualidade. Hafoin kursu ita sei halo promosaun diviza ba membru PNTL nain-34 ba postu Inspetór Asistente,” Komisáriu Faustino, hateten iha ámbitu  abertura formasaun ba promosaun diviza iha CFP, Comoro, segunda ne’e.

Komisáriu Faustino, dehan objetivu hosi formasaun ne’e atu foku ba kualidade rekursu umanu iha institusaun PNTL.

“Ha’u husu ba kandidatu PNTL nain-34 atu aproveita oportunidade ne’e ho di’ak, nune’e bele pasa iha kursu Ida ne’e,” Komandante Jerál ne’e enkoraja.

Iha biban hanesan, Komandante Sentru Formasaun Polisia (CFP, sigla Portugés), Superintendente Xefe Polísia, Arquimino Ramos, hateten, formasaun ba promosaun inspetór ne’e halo ba membru PNTL nain-34 ho baze pur estra-ordinária.

“Loos membru PNTL ne’ebé tuir formasaun ne’e nain-35, maibé na’in-ida tanba kondisaun saúde nia rezigna an ne’ebé hela deit nain-34,” nia akresenta.

Membru PNTL nain-34 ne’ebé tuir formasaun promosaun ne’e, maioria hosi diviza Sarjentu, Primeiru.  Sarjentu no Sarjentu Xefe.

Oknum Polísia hirak ne’e iha ona esperensia Komanda Unidade sira iha PNTL, hanesan Unidade Intervensaun Rápida (UIR), Komandante Eskuadra sira hosi munisípiu balun no Departementu sira iha Komandu PNTL.

“Liuhosi formasaun ne’e atu aprofunda koñesementu kona-ba teoria. Tanba teoria ne’ebé ita fó iha formasaun mak jestaun, polítika, disipliña, juridiku no hanoin inovativa hodi dezenvolve institusaun,” Komadante Arquimino afirma.

Alende ne’e, membru na’in-34, kompostu hosi mane 30 no feto nain-haat, sei hala’o mós prátika liuliu treinu fiziku iha Rairobo, postu Administrativu Atabae, munisípiu Bobonaro.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here