Segundu Komandante PNTL Munisípiu Bobonaro, Asistente Superintendente Fasio de Jesus Lima, tula diviza ajente prinsipál ba membru Leopoldo Gouveia Leite. Imajen PNTL Bobonaro.

BOBONARO,15 novembru 2021 (TATOLI) – Komandu Polísia Nasionál Timor-Leste (PNTL) Munisípiu Bobonaro, segunda ne’e, halo promosaun diviza ba membru  na’in-hitu hosi ajente ba postu ajente prinsipál.

Membru promovidu sira mak hanesan, Abílio Henriques, Ângelo Lourenço dos Santos, Leopoldo Gouveia Leite, Yohanes Estrey Belan Seda, João Gama Moniz, Bendito Soares no Januário da Costa.

Promosaun  hala’o ho modalidade antiguidade ne’e lidera hosi Segundu Komandante Munisípiu Bobonaro, Asistente Superintendente Fasio de Jesus Lima,  bazea ba despaxu Komandu Jerál númeru 298/CG-PNTL/XI/2021 ne’ebé aprova hosi Komandante Jerál PNTL, Komisáriu Faustino da Costa.

Asistente Superintendente Fasio de Jesus Lima, hateten, promosaun ne’e nu’udar pasu importante ida atu rekoñese membru sira-nia dedikasaun ne’ebé presta ona durante ne’e hodi motiva sai profisionál iha kualkér atuasaun.

“Ita halo promosaun ba membru na’in-hitu maibé rua seluk sei okupadu ho servisu seluk, entaun na’in-lima uluk depois mak ita tula diviza ba na’in-rua. Ida-ne’e katak ho diviza ajente durante tinan neen nia laran, sira la envolve iha krime ka infrasaun disiplinár ruma, signifika sira-nia komportamentu di’ak mak hetan promosaun ba ajente prinsipál,” nia ko’alia iha kampu futeból, Maliana, segunda ne’e.

Asistente Superintendente ne’e fó hanoin ba membru hirak-ne’e, katak la’ós de’it ho diviza ajente prinsípal ne’e, maibé depende ba membru sira-nia kapasidade, komitmentu, integridade pesoál no disiplina mak sei promove liután iha futuru.

Tanba tuir nia, promosaun la’ós finalidade ba serbisu, maibé hasa’e responsablidade boot liután oinsá hatudu nafatin konfiansa ba ierarkia sira, implementa serbisu tuir regra no lei haruka.

“Ha’u reprezenta komandante munisípiu enkoraja nafatin membru promovidu sira imporante liu mak naran di’ak instituisaun PNTL no  hatudu nafatin serbisu ho espíritu responsablidade iha emepeñamentu kada loron, atu nune’e labele implika ba sira-nia an rasik nomoos implika ba naran di’ak instituisaun, nune’e bele atende komunidade sira tuir orden,” nia kontinua fó hanoin.

Enkuantu daudaun ne’e membru efetivu hamutuk na’in 140-resin mak kolokada iha munisípiu Bobobonaro no eskuadra sira hanesan, Atabae, Balibo, Cailaco, Maliana, Bobonaro no Lolotoe.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here