Seremónia inaugurasaun haris-fatin públiku iha Behau. Imajen/GASC

DILI, 15 novembru 2021 (TATOLI)–Cruz Vermelha de Timor-Leste (CVTL) no Gabinete de Apoio Sosiedade Sivil (GASC) inaugura toilet públiku ida iha área Behau, aldeia Ilimanu, suku Uma-kaduak, postu administrativu Laclo, munisípiu Manatuto.

“Konstrusaun hosi CVTL ho medida 3,4 cm no naruk 6,70 cm, ne’ebé kompleta ho fasilidade sira hanesan sanitária, instalasaun bee-moos no eletrisidade, inklui lutu haleu hodi proteje hosi balada sira,” Prezidente CVTL, Madalena Hanjan Soares, hateten liuhosi nota ne’ebé Agência TATOLI asesu, segunda ne’e.

Hafoin halo inaugurasaun, Prezidente CVTL entrega diretamente fasilidade públiku ne’e ba autoridade aldeia Ilimanu hodi halo jestaun atu garante nia sustentabilidade no CVTL Manatuto rasik sei kontinua halo monitorizasaun, ne’ebé iha tempu badak parte rua sei diskute kle’an kona-ba regra utilizasaun.

Iha oportunidade ne’e, Reprezentante Koordenadór GASC, Laurinda Bety Leão Pinto, informa, GASC fó apoiu fundu ba CVTL ho montante $50.000 inklui kustu operasionál hodi konstrui toilet públiku rua, ne’ebé konstrusaun iha aldeia Ilimanu kompleta ona no falta ida iha fatin seluk.

“Objetivu CVTL konstrui fasilidade ne’e atu garante saúde públika iha korredór estrada Dili no Baucau, tanba fasilidade ne’e to’o ohin loron sai problema ba pasajeiru,” Laurinda Bety akresenta.

Nune’e, Laurinda Bety husu ba komunidade atu garante no mantein ijiene ba fasilidade públika ne’e, nune’e bele moos nafatin.

“Normalmente toilet públiku ne’e ema haree ladún moos no bele transmite moras sira ba vizitante, tanba ne’e husu komunidade atu kuidadu no garante kualidade obra hodi uza ba tempu naruk,” nia fó hanoin.

Iha fatin hanesan, tuir Xefe aldeia Ilimanu, Roberto Carlos, Behau sai fatin turístiku tanba turista lokál no estranjeiru sempre ba deskansa iha fatin ne’e, maibé, laiha toilet públiku hodi vizitante sira bele uza. 

“Esperiénsia hatudu katak vizitante barak mak husu komunidade nia toilet no barak mak soe fo’er lurón área turizmu nian, enkuantu pasajeiru lokál barak para iha fatin hirak ne’e atu konsumu ikan tunu no katupa, maibé sentina publika sempre iha kestaun ba sira molok kontinua viajen ba munisípiu sira, maibé agora konstrui ona, ida-ne’e di’ak tebes atu fasilita ema hotu ne’ebé halo viajen mai iha fatin ne’e,” nia hateten.

Toilet públiku konstrui ho durasaun fulan-lima, hahú fulan-juñu no ramata iha novembru 2021, ne’ebé realiza hosi ekipa supervizaun na’in-neen hosi CVTL no voluntáriu sira, ho totál orsamentu $25.000 ba verba konstrusaun fízika, instalasaun bee no eletrisidade.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here