Tenente Jenerál Lere Anan Timur, presta omenajen ikus ba Saudozu Domin. Imajen/Média PR

DILI, 14 novembru 2021 (TATOLI)- Prezidente Repúblika, Francisco Guterres Lú-Olo, hamutuk ho membru Governu no Komandu FALINTIL-Forsa Defeza Timor-Leste (F-FDTL)), ohin, presta omenajen ikus ba saudozu Tanente Koronel Infantaria, Domingos da Costa Santos ‘Domin’ iha Sentru Formasaun F-FDTL Metinaro-Dili.

Saudozu ‘Domin’ hakotu iis iha tuku 10:23, sábadu ne’e, iha Hospitál Nasionál Guido Valadares (HNGV) tanba sofre moras komplikadu.

Estadu Timor-Leste liuhosi Komandu F-FDTL valoriza saudozu nia dedikasaun iha luta libertasaun no ninian loyalidade iha institusaun F-FDTL hodi halo promosaun diviza hosi Tanente Koronel Infantaria ba postu Koronél.

Promosaun diviza ne’e, bazeia ba despaisu númeru 9004/C/2021, promove distinasaun Koronel ba saudozu “Domin” tuir lei númeru 23/2002, Estatutu militár, artigu 17 no artigu 68.  

Xefe Estadu Maiór Jenerál F-FDTL, Tenente Jenerál Lere Anan Timur, sente triste tanba lakon nia belun luta nain di’ak ida, durante iha ai-laran no mós iha institusaun F-FDTL.

“Ha’u sente triste tanba lakon belun di’ak ida ou luta na’in ida. Saudozu nuudar ema ne’ebé iha ninian loyalidade  ba ha’u no ba institusaun. Ita hotu la espera destinu, ida ne’e mak lala’ok moris ita labele halai ses hosi mate,” Tenente Jenerál Lere, hateten ho mata-been iha Sentru Formasaun Treinamentu F-FDTL Matinaro, domingu ne’e.

Lere dehan, maski saudozu “Domin” nia peregrinasaun iha mundu ramata ona , maibé nia naran lalakon hosi istória ba prosesu luta libertasaun nasionál no fundadór institusaun F-FDTL.

“Ha’u husu deskulpa ba iha Família sira tanba la konsege lori matebian Domin ba halo tratamentu iha li’ur tanba la’ós nia kompetensia másimu, ne’e kooperasaun entre Governu ho Governu,” nia afirma.

Komandante Lere mós husu ba Governu Timor-Leste atu kontinua tau matan ba feto faluk no oan ki’ak sira. Kontinua respeita no dignifika veteranu sira ne’ebé maka mto’o hodi haloot sira ho dignu.

Molok, trasporta mate-isin suadozu Koronél Domin ba nia moris fatin Lospalos atu hala’o seremonia funebre, liuhosi nia serbisu fatin Kuartel Jenerál F-FDTL Fatuhada no Sentru Formasaun F-FDTL Metinaro hodi fó ultimu omenajen.

Biografia Saudozu Koronel Domin

Saudozu Domingos da Costa Santos (Domin/Jeming) moris iha Mehara,  loron 01 janeiru 1965. Saudozu mate  ho idade 55. Oan-hosi Roberto Gomes da Costa no Saraiva do Céus.

Saudozu husik hela nia kaben Cristinha dos Santos Cruz no oan na’in tolu, hanesan, Azay Domingos Costa Santos, Zenifer Cristine Santos, Rivaldo Domingos Santo.

Saudozu hahú nia estudu iha Eskola Primaria Lospalos iha tinan 1980 to’o 1981. Eskola Pre-Secundaria Lospalos iha tinan 1981 to’o 1983.

Istória partisipasaun luta libertasaun Nasional, iha loron 20 agostu 1975 to’o 6 dezembru 1977, Saudozu nu’udar membru Forsa Armada Baze Apoiu. Iha loron 7 dezembru 1977 to’o 30 abríl 1981, saudozu nu’udar membru grupu Forsa Armada Paicau.

Xefe Kasa Sívil Prezidente Repúblika fó omenajen ikus ba Saudozu Domin. Imajen/ Média PR

Hosi 1981 to’o 1983, saudozu nuudar membru grupu Forsa Armada Loriku Ramelau, iha loron 8 agostu 1983 to’o 31 dezembru 1985, Saudozu nu’udar soldadu kompania autonomu Kuba.

Iha loron 1 janeiru 1986 to’o 31 dezembru 1991, saudozu nu’udar ativisita kompania Bonifacio Pires. Iha loron 1 janeiru 1992 to’o 31 dezembru 1997 nu’udar Komandante Rejiaun Bonifacio Pires no iha 1 janeiru 1998 to’o 25 outubru 1999, saudozu nu’udar asistente Polítiku Rejiaun I Ponta Leste.

Funu na’in FALINTIL, nia partisipasaun iha luta libertasaun Nasionál, hanesan Frente Armada no mós Frente Clandestina, nune’e  saudozu ninia dedikasaun esklusivu 15 to’o 19 ho kondekorasaun Ordem Loriku Asuwa’in iha 12 Novembru 2008.

Iha loron 02 fevereiru 2021, Saudozu Domin hahú inkorpora iha F-FDTL iha instrusaun primeira formasaun iha Aileu. Iha loron 21 juñu 2001, saudozu hetan promosaun ba kapitaun iha Sentru instrusun provizóriu Aileu.

Iha 07 jullu 2001, saudozu koloka iha Sentru Instrusaun Nicolau Lobato (CICNL) Metinaro nu’udar Ofisiál Apoio. Iha 19 fevereiru 2002, Saudozu koloka fali iha kuartél Jenerál nu’udar Adjuntu Operasaun.

Nune’e, iha 14 jullu 2002 to’o 28 jullu 2003, saudozu koloka fali iha Sentru Instrusaun Nicolau Lobato (CICNL) Metinaro nu’udar Komandante kompania Intrusaun.

Iha 28 jullu 2004, saudozu koloka ba fali iha 2º Batalliaun nu’udar Xefe Operasaun.  Loron 13 dezembru 2004 koloka mai fali iha Sentru Instrusaun Nicolau Lobato (CICNL) Metinaro nu’udar Ofisial Operasaun.

Iha loron 25 marsu 2005, komandu koloka fali saudozu fali iha 2º Batalliaun nu’udar Ofisial Operasaun, nune’e iha loron 16 dezembru 2005, komandu F-FDTL promove ba Major.

Iha loron 21 marsu 2009, saudozu koloka ba fali iha kuartel jeneral nu’udar xefe Planeamentu (J5) no asume mós komandante kompañia iha komponente Terrestre.

Iha 12 outubru 2015, Saudozu sai nu’udar Adido Defeza Timor-Leste ba Portugál no ramata mandatu kolaka filafali iha Kuartél Jerenál nu’udar Xefe Avaliasaun Pesoál.

Iha loron 06 dezembru 2016, Saudozu kolaka fali iha Ministériu Defeza nu’udar Xefe Gabinete Armamento Defeza no 19 marsu 2019 kolaka fali iha kuartel nu’udar xefe divisaun operasaun (J3) to’o Saudozu husik mundu.

Notísia Relevante: Tanente Koronel Infantaria ‘Domin’ hakotu iis tanba sofre moras komplikadu

Jornalista : Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here