Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Francisco Sony.

DILI, 13 novembru 2021 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten, atribuisaun suplementu remuneratóriu ba profisionál sira dezenvolve atividade jornalístika, ne’ebé fornese informasaun kona-ba mitigasaun COVID-19 durante fulan-sia (abríl to’o dezembru) 2021 no kada loron $5.

“Razaun tanba sá ami define kada loron $5, tanba haree ba situasaun ne’ebé akontese no la’o ona, iha tinan 2020 ha’u mai asume knaar ne’e ami halo lei ida atu atribui subsídiu ba jornalista, maibé hetan protesta hosi jornalista sira tanba barak la hetan entaun halo oinsá mak bele akomoda ema hotu, entaun iha nosaun katak atu akomoda hotu ne’ebé halo serbisu iha liña frente iha fatin ne’ebé de’it, entaun presiza halo ezersísiu ida kona-ba montante, nune’e bele to’o ba hotu,” Ministru informa hafoin enserra kongresu extraórdinariu Timor-Leste Press Union (TLPU), iha salaun Delta Nova, sábadu ne’e.

Foin lalais, liuhosi reuniaun Konsellu Ministru (KM), aprova Projetu Dekretu-Lei ba kriasaun subsídiu profisionál sira ne’ebé dezenvolve atividade jornalístika, ne’ebé profisionál sira ne’e hala’o funsaun ho forma ezemplár hodi kontribui ativamente ba divulgasaun informasaun ne’ebé kredível no nesesária kona-ba prevensaun no kombate pandemia iha territóriu nasionál.

Notísia relevante: Governu kria subsídiu ba profisionál dezenvolve atividade jornalístika durante mitigasaun COVID-19

Razaun seluk tanba iha situasaun serka sanitária no konfinamentu domisiliáriu obrigatóriu, bazeia ba dekretu-lei katak atividade prezensiál ne’e labele hala’o loron-loron, katak loron-ida hala’o serbisu loron tuir mai laiha.

“Entaun atribuisaun suplementu remuneratóriu ba jornalista presiza dekretu-lei ketak, la hanesan ho ajente administrasaun Estadu, tanba ne’e kria ketak. Nune’e atribuisaun suplementu remuneratóriu ne’e ho montante hanesan, kada loron $5 ba jornalista hotu,” nia esplika.

Dekretu-lei ne’e aprova ona no iha segunda (15/11) sei haruka ba Prezidente Repúblika hodi promulga.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here