Prezidente CNJTL, Maria Dadi Soares Magno. Imajen Tatoli/Egas Cristovão.

DILI, 12 novembru 2021 (TATOLI)—Prezidente Konsellu Nasionál Juventude Timor-Leste (CNJTL-sigla portugés), Maria Dadi Soares Magno, husuGovernu tenke implementa ona polítika nasionál juventude ba joven sira.

Notísia Relevante: CNJTL Serbisu Hmutuk ho SEJD Konsege Prodús Polítika Juventude Nasionál

“Ita husu atu Governu bele kria espasu no implementa ona polítika nasionál juventude nian, oinsá bele iha fundu ida ba juventude sira atu sira mós iha kréditu hodi bele hasa’e sirania kualidade vida iha vida ekonomia ho independentemente,” Maria Dadi Soares Magno hateten ba Agência Tatoli, iha ámbitu komemorasaun Loron Nasionál Juventude no Masakre Santa Cruz ba dalaXXX, iha nia knar fatin, Farrol, Díli, kinta ne’e.

Aleinde ne’e, nia husu ba joven sira atu halakon ona hanoin katak traballadór juventude sira-ne’ebé ba servisu iha Korea, Austrália, Irlandia no Inglatera hanesan atan ba ema, tanba ho sira ba servisu iha li’ur bele fó taxa mai Estadu kuaze besik 80%, tanba ne’e tenke agradese no orgullu ba sira.

“Maibé, polítikamente hanoin bele para ona ho ida ne’e no husu mós ba Governu atu reduz no loke kampu traballu iha itania rai, liliu indústria”, nia katak.

Tanba, CNJTL hanesan Organizasaun umbrela no sai mahon ba organizasaun juventude rezistênsia no sai mahon mós ba nia kundru estrutura konsellu juventude munisípiu, postu, no mós ba kamada juventude hotu no hanesan organizasaun mahon iha misaun boot, atu oinsá enkoraza, motiva no dudu juventude sira atu partisipa ativu, responsivu, krítiku no análiku iha prosesu dezenvolvimentu.

“Ha’u hanoin ida ne’e misaun klaru, katak nia (CNJTL) pozisaun atu fó konsellu no hanesan organizasaun nia iha esperansa boot ba juventude idakidak ne’ebé ho vizaun prinsipál oinsa sosiedade, liliu juventude TimorLeste moris iha independentemente, saúdavel, hakmatek no respeita ba valores demokrásia, iguáldade jeneru no justisa sosiál,” nia dehan.

Maske nune’e, Konsellu Nasionál Juventude rekoñese mós katak iha TimorLeste kuaze dadus hatudu iha tinantinan juventude ho idade produtivu hamutuk rihun 15-resin mak tama iha kategória dezempregu, maibé CNJTL mós define katak dezempregu hanesan ema la servisu no la hetan servisu, maibé iha kontestu TimorLeste realidade hatudu katak juventude dezempregu iha kategória barak.

Hanesan, juventude sira ladun iha esperiénsia maibé sira tenke ba buka servisu, kuaze hosi servisu ne’e ladún iha espasu ba sira atu hetan, maibé ba sira ne’ebé loroloron ba buka servisu no sira ne’ebé iha servisu mós salariu mínimu, tanba background seidauk iha esperiénsia.

“Ho ida-ne’e, problema oinsa mak CNJTL nia haree, klaru katak CNJTL halo advokásia makaas no CNJTL prodúz ona polítika nasionál juventude,” nia hateten.

Ho polítika nasionál juventude ne’e, oinsa mak Estadu iha estrátegia intervensaun haree ba problema boot lima liga ba juventude sira hanesan juventude liga ba saúde, edukasaun, empregu no empregalidade, partisipasaun cívika no violénsia no krime.

“Entaun, ida ne’e polítika CNJTL rasik halo ona advokásia makas no ita rasik sai portavoz ba defende polítika nasionál juventude hodi bele hetan aprovasaun iha Konsellu Ministru no agora ita hein vontade hosi Ministériu tutela, liuhosi Sekretária Estadu Juventude no Desportu. Tanba ne’e, polítika Governu hakarak ka lakohi, ida-ne’e Governu nia kompêtensia atu haree ba ne’e,”  nia dehan.

Tanba ne’e, hanesan organizasaun independentemente nafatin kontinua hakilar no husu, maske konsidera eskola hotu la garante katak tenke servisu no loke servisu, maibé Estadu iha responsabilidade boot no responsabilidade morál katak problema dezempregu bele efeitu boot ba iha kestaun seguransa.

Nia hateten, hanesan organizasaun kontinua husu atu edukasaun no kurrikulu tenke integradu, aleinde forma karáter, la’ós aprende de’it siénsia maibé oinsá mak kuda ona empreendedorizmu.

“Ezemplu, ema ida iha interese hakarak sai doutór, pílotu no funsionáriu pelemenus nia tenke iha vontade negósiu (jiwa bisnis), tanba agora ita iha era dijitalizasaun for zero indústria ne’ebé boot. Entaun, joven tenke preparadu, hanoin milleniál, vizaun globál no kontinua labele tauk atu kompete no tenke preparadu, kreativu no inovativu iha prosesu ida tomak,” nia dehan.

Ho ne’e, CNJTL haree situasaun reál ne’ebé iha, nia solusaun polítika desentralizasaun tenke la’o atu munisípiu no postu idakidak haree nia kualidade rekursu. Maske la fasil maibé tenta atu fó kompeténsia hodi ema hotu labele mai nakonu iha Dili. Se bainhira barak iha Dili bele mosu konflitu no problema dezempregu bele afeta ba injustisa.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here