Partisipasaun joven rezisténsia ne'ebé koñesidu ho masakre Santa Kruz. Foto google

BOBONARO,12 novembru 2021 (TATOLI) — Juventude sira hosi postu administrativu Atabae, munisípiu Bobonaro, realiza marsa ba pás hosi igreza Parókia Atabae to’o monumentu Atabae vila, hodi selebra masakre 12 Novembru ne’ebé halo ona tinan 30.

Prezidente Komisaun Organizadora 12 Munisípiu Bobonaro, Angelo Guilherme, informa atividade ne’e atu inspira joventude sira hodi fo onrá no valoriza nafatin sakrifísiu no dedikasaun ne’ebé juventude sira fó-aan iha 30 liubá iha semitériu Santa Kruz.

“Marsa ba pás ne’e ami halo iha Atabae laran kuaze kilómteru rua, ami sunu lilin tuituir dalan no ohin ami halo tán marsa ho sentidu ida katak atu re-lembra ita-nia joven no mate-restu sira ne’ebé uluk esforsu sakrifika sira-nia an sé hirus-matan, hodi fó tomak vida ba rai ida-ne’e to’o hetan independénsia,” nia ko’alia iha monumentu Atabae, sesta ne’e.

Entretantu Sekretáriu Autoridade Munisipál Bobonaro, Júlio Carvalho Caero, esplika razaun selebra loron istóriku ne’e iha Atabae, nune’e jerasaun foun sira bele hatene istória no konta tutan hosi jerasaun ba jerasaun.

“Ha’u kontente tanba haree ita-nia joven komesa iha ona hanoin atu valoriza ita-nia eroi sira-nia lut,” nia katak.

Juventude ne’ebé partisipa iha atividade marsa ne’e, mai hosi Eskola Téknika Vokasionál (ETV) Atabae, Eskola Bázika Sentrál (EBC) númeru 3 Atabae no juventude sira hosi Atabae.

Enkuantu atividade ne’ebé realiza iha komemorasaun masakre Santa Cruz iha munisípiu Bobonaro mak hanesan, semináriu ho tema “Espíritu As’wain 12 novembru, juventude sai autór importante ba dezenvolvimentu nasionál.”

Nune’e mós halo kampaña vasinasaun ho modelu dor to dor, marsa ba pás, kalan reflesaun, misa agradesimentu iha igreja Parókia Atabae no ikus kari ai-funan iha monumentu Atabae vila.

Entertantu  Autoridade Munisipál Bobonaro, hetan apoia fundu  hosi Sekretaria Estadu Juventude no desportu (SEJD) ho montante $3.500,00.

Konsentra iha Rotunda Maliana

Nune’e mós joven sira feto no mane hola inisiativa rasik, organiza malu hosi bairru ba bairru, sunu-lilin iha rotunda Maliana, munisípiu Bobonaro, hodi komemora tinan 30 masakre Santa Cruz 12 Novembru.

Juventude Maliana, Leopoldo da Costa, hateten sunu lilin hanesan sentidu ida, atu fó onra no valoriza joventude as’wain sira-nia kontribuisaun ba luta libertasaun nasionál.

“Ami hanesan jerasaun kontinuadór, iha momentu importante ida-ne’e ami voluntariamente tau osan $25 sentavu sosa lilin mai sunu iha fatin ida-ne’e, hodi hodi hanoin hikas akontesimentu masakre Santa Kruz tinan 30 ba kotuk, espera liuhosi lilin nia lakan bele fó  naroman ba ita-nia joven sira-ne’ebé uluk mate ba rai ida-ne’e,” nia katak.

Joven sira labele oho malu beibeik

Entretantu, Padre Paróku Atabae, Pe Kornelis Key SDV, husu juventude sira iha territóriu nasionál hapara ona oho-malu iha era idenpendensia, tanba eroi sira konkista ona liberdade totál hosi inzasaun ilegál Indonézia.

“Ita-nia independénsia hanesan grasa ida maromak fó mai ita, nune’e matan been labele fakar naran naran de’it, ema labele mate arbiru, moris vida naruk to’o idade 80. Ita labele oho malu beibeik tanba ita ukun-an ona,” Pé Korenlis, esplika liuhosi misa agradesimentu iha Parókia Atabae.

Padre Pároku ne’e hateten, joven sira tenke serbisu ho responsablidade, maduru, unidade, fraternidafe no solidu iha asaun nune’e labele akontese tán fakar-raan sulin hanesan akontese iha 1975 to’o 1999.

“Matebian sira kontente tanba agora ita la hatais lutu-metan hanesan uluk momentu masakre Santa Kruz, ita-nia matan-been Maromak dasa tiha ona ho idependénsia, agora ita ukuan-aan, aihan mesak furak-furak deit iha foho no iha sidade,” padre ne’e katak.

Mat-restu 12 Novembru, Cansio Perreira, enkoraja juventude sira atu banati tuir unidade ne’ebé juventude loriku as’wain sira halo hodi kontra inimigu iha okupazaun ilegál.

“Agora ita ukun an ona, nasaun tau neon ba imi, nasaun tau fiar ba imi, atu sai kontinuadór ba imi nia aman, Xanana Gusmão, Ramos Horta, Lu-Olo, Taur Matan Ruak no Alkatiri,” mate-restu ne’e fó hanoin ba joven sira.

Jornalista: Sérgio da Cruz

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here