Reprezentante Sobrevivente Masakre Santa Cruz hosi postu Atabae, munisípiu Bobonaro, Cancio Pereira. Imajen TATOLI/Sérgio da Cruz

BOBONARO, 13 novembru 2021 (TATOLI)—Reprezentante Sobrevivente Masakre Santa Cruz 12 novembru 1991 hosi postu Atabae, munisípiu Bobonaro, Cancio Pereira, husu Governu rekoñese no valoriza sakrifísiu sobrevivente sira ne’ebe sakrifika-an ba luta libertasaun nasionál iha tinan-30.

“Husu ba Governu, tamba ita ukun-an tinan-20 ona, ema sira ne’ebé momentu ne’ebá sakrifika-an ba luta rai ida-ne’e, balun to’o ohin loron seidauk tau konsiderasaun ruma, se bele rekoñese ba tamba sira sakrifika-an voluntáriamente ba independénsia rai ida-ne’e,” Reprezentante Sobrevivente hateten ba Agência TATOLI, iha Atabae, sábadu ne’e

Tuir nia, desde Timor-Leste restaura independénsia, sobrevivente barak mak hetan ona rekoñesimentu hosi Governu, maibé balun to’o agora seidauk hetan medalla kondekorasaun ruma.

Sobrevivente ne’e haktuir, uluk sira hamutuk joventude sira hosi organizaun no fatin oioin organiza malu halo manifestasaun hodi kontra invazór Indonezia no laiha hanoin atu hetan rekoñesimentu no direitu ba pensaun iha ukun-an, maibé ho objetivu atu luta hodi garante destinu nasaun tenke ukun rasik-an.

“Ami-nia kolega lubuk ida mate hotu ona, maibé la senti netik buat ruma to’o agora, maibé ami-nia sofrimentu durante rezisténsia fó valór boot tebes ba rai ida-ne’e, entaun se bele Estadu no Governu tenke valoriza sobrevivente tomak molok mate,” nia akresenta.

Biban ne’e, Sobrevivente ne’e rekomenda ba Governu atu halo verifikasaun lalais ba dukumentu ne’ebé submete ona, nune’e labele hamosu diskriminasaun hodi trata sobrevivente sira ho dignu.

“Informasaun ne’ebe ami simu, prosesu administrasaun mak to’o agora seidauk la’o ho di’ak tamba situasaun Governu, kona-ba orsamentu ne’ebé atu ba membru 12 novembru ne’ebé seidauk hetan kondekorasaun, ha’u fiar katak sei difísil oituan, maibé tuir informasaun katak iha tinan 2022, sira ne’ebé seidauk hetan bele hetan tratamentu,” nia informa.

Jornalista : Sérgio da Cruz

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here