Bandeira RDTL. Imajen/Espesiál

BOBONARO, 12 novembru 2021 (TATOLI) — Sekretáriu Autoridade Bobonaro, Júlio Carvalho Caero, konsiensializa komunidade iha postu administrativu neen, atu dada sa’e bandeira iha uma oin hodi komemora loron Proklamasaun Independénsia 28 novembru iha tinan ida-ne’e.

Iha fulan-outubru liubá, autoridade munisipál orienta ona administradór postu administrativu sira, suku 50, atu aviza komunidade sira dada bandeira iha ida-idak uma oin, maibe realidade komunidade barak seidauk iha konsiénsia kumpre desizaun ne’e. 

Sekretáriu autoridade munisipál Bobonaro, Júlio Carvalho Caero. Imajen Tatoli/Sérgio da Cruz.

“Ha’u observa durante ne’e komunidade barak mak seidauk hasa’e Bandeira iha uma oin, no iha Atabae rasik mós seidauk hotu, depois ami sei orienta nafatin atubele hasa’e hotu nune’e ita komemora ita-nia loron Proklamasaun Independénsia 28 novembrube’e,” nia ko’alia iha Atabae, hafoin komemora tinan 30 masakre 12 Novembru, sesta ne’e.

Tuir nia, dada sa’e bandeira nu’udar símbolu ida atu fó onra ba eroi no martir sira-ne’ebé sakrifika vida tomak ba luta libertasaun nasionál, hodi manán independénsia hosi invasaun ilegál Indonézia.

“Bandeira ida-ne’e hamriik tanba ema lubuk ida mak mate, barak mak lakon to’o agora la hetan isin no ruin, lakon fén no oan. Ne’e duni hosi ita-nia as’wain sira-nia luta mak ohin ita goza independénsia, nune’e ita ne’ebé sei moris tenke valoriza sira-nia terus liuhosi asaun sira-ne’e,” nia akresenta.

Entretantu Mate-restu 12 Novembru, Cançio Perreira, triste tanba besik tama ona ba loron 28 Novembru, baindeira RDTL seidauk hamrik iha komunidade nia uma oin.

“”Ida-ne’e ita-nia autoridade munisípiu no autoridade postu sira mak iha kompeténsia oinsá atu organiza komunidade sira partisipa iha selebrasaun loron importante ne’e, tanba ha’u rasik horisehik la’o ba iha Atabae, ha’u haree komunidade barak seidauk hasa’e Bandeira iha uma oin, komunidade sira la hetan informasaun hosi xefe suku sira,” nia hateten.

Nia fo hanoin katak,governu no presiza kria aktividade kompetisaun desportu,nune’e bele halibur komunidade sira iha ida-idak nia postu,atu partisipa masima iha festa loron istoriku ne’e.

Iha tinan ne’e, Sekretaria Estadu Juventude no Desportu (SEJD) apoia orsamentu ba munisípiu hotu-hotu, munisípiu Bobonaro hetan $37.350.00.

Hosi montante ne’e aloka ba postu administrativu neen mak hanesan, Atabae $4.706.00, Balibo $5,434.00, Bobonaro $9,502.00, Cailaco $6,112.00, Loloto’e $5.773.00 no Maliana $5,773 hodi realiza jogu komunitária.

Jogu komunitária ne’e komposta hosi modalidade futeból sub 11 no futsál, voleiból, atletizmu, jogu tradisionál Talik no jogu tradisionál seluk ne’ebé postu administrativu hirak-ne’e.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here