Reprezentante veteranu hosi Uatulari, Moises Soares da Silva ‘Bere-koko’. Imajen TATOLI/ Vitorino Lopes da Costa

VIQUEQUE, 12 novembru 2021 (TATOLI)–Reprezentante veteranu hosi Uatulari, Moises Soares da Silva ‘Bere-koko’, husu juventude Viqueque kaer hametin unidade no paz hodi kontribui ba prosesu dezenvolvimentu nasionál iha Timor-Leste.

“Ha’u husu ba juventude sira, liuliu iha munisípiu Viqueque tomak atu kaer metin unidade no paz iha ita-nia munisípiu hodi kontribui ba prosesu dezenvolvimentu,” Veteranu Moises Soares, hateten ba Agência TATOLI, iha ámbitu komemorasaun tinan-30 Masakre Santa Cruz no tinan-16 Loron Nasionál Juventude iha loron 12 novembru, iha postu Uatulari, sesta ne’e.

Veteranu ne’e husu joven sira labele hanoin halo problema, maibé tenke estuda tanba ho matenek mak bele kontribui ba dezenvolvimentu.

Nune’e mós, nia husu ba populasaun tomak atu labele fihir ba kor partidária, tanba maski kor partidu ketak, maibé tenki hametin prinsípiu unidade.

Iha fatin hanesan, Administradór postu Uatulari, Manuel do Rosário, husu joven sira atu hala’o atividade ne’ebé bele hasa’e koñesimentu no abilidade.

“Ha’u husu ba joven sira, liuliu Uatulari, labele hanoin maka tuur iha dalan de’it, maibé di’ak liu tuur iha uma hodi estuda hodi prepara-an iha prosesu dezenvolvimentu. Se agora imi la prepara-an, aban bain-rua imi sai penoton ba dezenvolvimentu,” nia enkoraja.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here