Reprezentante sobrevivente 12 novembru 1991, postu Uatulari, Manuel Pinto. Imajen TATOLI/ Vitorino Lopes da Costa

VIQUEQUE, 12 novembru 2021 (TATOLI)-Reprezentante sobrevivente 12 novembru 1991, postu Uatulari, Manuel Pinto, husu Estadu fó rekoñesimentu ba juvenil rezisténsia ne’ebé tempu funu kontribui ba luta ba independénsia.

“Husu Estadu no Governu fó mós rekoñesimentu ba juvenil rezisténsia sira, ne’ebé mak uluk hola parte funu ho idade kiik, maibé lei la fó dalan hodi rekoñese. Tanba ne’e, ha’u sujere tenki fó rekoñesimentu,” Manuel Pinto hateten ba Agência TATOLI, iha uma mahon restu mortál, iha postu Uatulari, sesta ne’e.

Reprezentante sobrevivente ne’e nota katak iha tempu funu nia laran, ho situasaun ne’ebé difísil, sempre rekoñese juvenil sira-nia papel iha momentu ne’ebá, maibé tempu ukun rasik-an, esklui tiha rekoñesementu, valorizasaun no dignifikasaun.

“Ema minor idade barak maka envolve rezisténsia nível organizasaun no masakre, maibé to’o oras ne’e komisaun omenajen esklui, maibé dalan di’ak maka fó rekoñese ba joven rezisténsia sira. Realidade ha’u foti faktu ida iha Uatulari, ita-nia sobrevivente ida hanesan autór ida ho naran Mateus Lopes, iha suku Makadique, agora ninia kondisaun moris a’at tebes, maibé Estadu seidauk rekoñese,” nia akresenta.

Kona-ba rekoñesimentu, Reprezentante sobrevivente Uatulari ne’e dehan, nia parte hetan ona subsídiu, maski oituan maibé agradese ba rekoñesimentu no valorizasaun.

“Subsídiu ne’ebé ha’u hetan, agora rai ba ha’u-nia oan nia eskola,” nia tenik.

Entretantu, ba kestaun ne’e Agência TATOLI seidauk konsege hetan konfirmasaun hosi komisaun omenajen munisípiu Viqueque.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here