Membru GAM ne'ebe PNTL detein.Imajen/ PNTL

DILI, 12 novembru 2021 (TATOLI)- Komandu Polisia Nasionál Timor-Leste (PNTL), Munisipiu Bobonaro, sesta (12/11/), liuhosi Departementu Investigasaun Kriminál intensifika patrullamentu hodi detein membru Grupu arte Marsial (GAM) na’in-ualu ne’ebé hakat ilegál iha fronteira.

“Iha loron 12 novembru, tuku 10:30, dader, iha área fronteira konsege detein sidadaun nain-ualu husi Grupu Arte Marsiál (GAM) hosi Persaudaraan Setia Hati Terate (PSHT) nian iha Suku Memo, Postu Administrativu Maliana ne’ebé foin fila hosi Atambua-Indonézia,” refere nota imprensa ne’ebé Agência TATOLI asesu, sesta ne’e.

Hosi sidadaun nain ualu, kompostu hosi mane nain hitu, no iha feto nain-ida (1) hamutuk ho evidensia komprovativu sira hanesan farda no sintu ka sabuk arte marsiál nian .

Daudaun ne’e,  ekipa investigadór foti ona identidade iha Komandu PNTL Munisipiu Bobonaro no entrega ona ba ekipa saúde, hodi  kumpre protokolu saúde nian halo teste restreiu no kumpre kuarentena durante semana rua nia laran iha izolamentu Mota-Ain, Batugade.

Relasiona ho kestaun ne’e, Komandante PNTL Munisipiu Bobonaro, António Mauluta orienta ona nia membru sira, halo operasaun hodi apoiu Unidade Polisia Fronteira (UPF) no  Unidade Polisia Maritima (UPM) hodi kontrola rigorozu liña fronteira nu’udar parte ida hodi halo prevensaun no asegura fronteira sai fatin seguru ba ema hotu.

Jornalista : Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here