Padre Selebrante, João Tamonob. Imajen TATOLI/Vitorino Lopes da Costa

VIQUEQUE, 12 novembru 2021 (TATOLI)—Padre Selebrante, João Tamonob, hateten, komorasaun loron 12 novembru 1991 marka istória importante ba joven sira agora, hodi banati tuir joven rezisténsia nia espíritu ba luta independénsia Timor-Leste.

“Joven rezisténsia otimista ba luta independénsia Timor-Leste, maski sira hasoru situasaun difísil, maibé ho aten brani hasoru situasaun sira ne’e hodi defende direitu povu Timor-Leste. Moto hosi joven rezisténsia maka, la’ós ita, sé tan fali no la’ós ohin banhira tan, ne’ebé sira konsege defende no luta hasoru inimigu, balun lakon vida no balun fakar raan hodi ohin ita hetan independénsia,” Padre selebrante, hateten ba Agência TATOLI, hafoin misa komemorasaun loron 12 novembru 1991 ba dala-30, iha Parokia Nossa Senhora de Fátima Uatulari, sesta ne’e.

Tinan ne’e, komemora tinan-30 Masakre Santa Cruz no tinan-16 Loron Nasionál Juventude iha loron 12 novembru.

Nia konsidera, joven rezisténsia iha aten brani la’o ba oin no kria unidade ‘mate ka moris, sai ida de’it no sai kontributór ba asaun realidade’, ne’ebé rezisténsia sira halo iha situasaun kolonializmu nia okos no sira hatudu patriotizmu hodi hetan liberdade ba povu.

Nune’e, Padre husu ba joven sira tenki ersforsu-an estuda hodi kontribui ba prosesu dezenvolvimentu Timor-Leste nian.

“Ha’u husu joven agora tenke esforsu-an ba estuda, tanba joven barak maka agora ne’e preokupa ba telemóvel no lakohi kaer ba livru no kadernu, enkuantu kontribui ba dezenvolvimentu presiza matenek hodi dezenvolve ita-nia rain,” Amu João Tamonob enkoraja.

Misa komemorasaun loron istóriku ne’e partisipa hosi Administradór postu Uatulari, Manuel do Rosário, Komadante Polísia Nasionál Timor-Leste (PNTL) munisípiu Viqueque no komadete PNTL munisípiu Ainaro, Autoridade lokál, komunidade Uatulari, estudante Universidade Nasionál Timor Lorosa’e (UNTL), juventude Uatulari, inklui komunidade lokál.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here