Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares. Imajen Tatoli/Natalino Belo.

BAUCAU, 12 novembru 2021 (TATOLI) – Konsellu Munisipál Kombatente Libertasaun Nasionál Baucau (CMCLN, sigla Portugés) husu Juventude Baucau unidade no hametin estabilidade iha nasaun ne’e.

Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares, hateten lisaun ne’ebé sai ezemplu hosi juventude ne’ebé iha 12 Novembru 1991 mesmu hosi fatin no grupu oinoin maibé hamutuk iha sumbriña ne’ebé hanaran juventude loriku as’wain, akumula hotu hamutuk hato’o situasaun Timor nian iha tempu ne’ebá ba mundu.

“Juventude uluk sai referénsia ba juventude agora, tenke unidu, kria estabilidade nune’e dezenvolvimentu bele la’o, povu bele sente hakmatek nune’e bele livre halo movimentu hodi hasa’e rendimentu ekonomia uma-laran,” veteranu ne’e informa ba Agência TATOLI iha ninia knar-fatin, vila antiga, sesta ne’e.

Maibé realidade hatudu, ema hotu triste tanba juventude agora mai hosi organizasaun barak maibé la hamutuk.

Nune’e Alari rekomenda ba governu liuhosi Sekretaria Estadu Juventude no Desportu (SEJD), Ministériu Edukasaun Juventude no Desportu (MEJD) inklui autoridade munisípiu no veteranu presija tuur hamutuk konvida lideransa joven sira husu no hanoin kona-ba saida mak presiza tau hamutuk atu unifika joven iha Baucau.

“Tempu ona atu iha hamriik, servisu, koopera hamutuk buka solusaun ba problema ida-ne’e, nune’e loron boot ruma ema la’o ho livre,” Alari fó hanoin.

Sekretáriu jerál ne’e mos konsidera estadu rekoñese no valoriza ona kontribuisaun juventude sobrevivente 12 Novembru maibé iha balun mós inventa-aan sai vítima mesmu la envolve iha tempu ne’ebá.

Entretantu, grupu juventude Baucau selebra loron 12 novembru iha suku Samalari, postu administrativu Baucau vila liuhosi atividade marsa ba dame, kalan refleksaun, aprezentasaun teatru 12 Novembru, hasa’e bandeira, sunu-lilin iha monumentu memoriál Saudozu David Alex ‘Dai Tula’ no halo kampaña vasinasaun ba populasaun sira-ne’ebé seidauk simu vasina AstraZeneca.

Notísia relevante: Juventude Baucau realiza marsa ba dame selebra 12 Novembru

Jornalista         :Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here